| اشترك عبر RSS

تحيا الصناعة المصرية

11 November, 2010 | 6 تعليقات | مصنف في تجارة إلكترونية

صنع في مصر

الاسبوع اللى فات كنت بحضر محاضرة منظمها موقع سوق.كوم ضمن فعاليات الاسبوع العالمي لشباب الأعمال وكانوا مستضيفين شباب بيبيعوا على سوق عشان يحكوا تجربتهم. اللى لفت نظري في الموضوع دة ان كل المنتجات اللى الشباب دول بيبيعوها ونجحوا في تقديمها للسوق المصري وعجبت الناس هى منتجات مصرية عاملها شباب مصريين سنهم لا يتعدى الثلاثينات او حتى العشرينات

كتير جدا بتوصلني عروض عن طريق موقع علي بابا او موقع لينكد إن من مصانع خارج مصر عشان يصنعولي حاجتي بجودة عالية وطبقا للمواصفات اللى انا احددها لكن دايما برفض (حتى الآن) لسبب واحد وهو ان أصلا كثير جدا من الماركات العالمية بتتصنع هنا في مصر! يعني احنا عندنا مصانع قادرة على تصنيع منتجات عالية الجودة.. ايه اللى يخليني اطلب من مصانع خارج مصر ؟

طبعا هذا لا ينطبق على جميع الصناعات لكن لما يكون المنتج اللى انت عايز تشتغل فيه ممكن يتصنع في مصر صنعه في مصر مع مراعاة بعض الأشياء اللى هقول عليها لعل البعض يستفيد من تجربتي:

  • مش عيب انك تصنع عند الغير

في اسئلة وردت للشباب بتقولهم ليه مش عندكوا مصانع بتاعتكم

الاجابة ببساطة: ايه اللى يجبرهم على كدة؟ دلوقتي اكبر الماركات قفلت مصانعها وبقت بتصنع عند الغير زى ما ذكرنا ان فيه منهم بيصنع في مصر يعني الماركات دي لا تملك مصانع ودة لأنهم وجدوا ان دي افضل طريقة تناسب شغلهم ومجدية ماديا

ايه اللى يخليك تتحمل عبئ مصنع وعمال ومرتبات وتشتري مكان وتدفع مرافق في حين ان فيه مصانع موجودة وجاهزة وممكن تعملك اللى انت عايزه وبالمواصفات بتاعتك وبعد كدة انت تبيعه في متجرك

  • مش كل المصانع المصرية هتوافق تتعامل معاك

اول ما عملت اعلان في علي بابا في واحد كلمني وسألني سؤال واحد

قال: انتي بتشتغلي تصدير؟

قلت: لأ بشتغل في السوق المحلي

قفل السكة في وشي!

طب انا دلوقتي مش فاهمة مشكلتك.. مادمت انا هاخد منك بضاعة وادفعلك تمنها ايه المشكلة لما انزلها سوق محلي ولا المصريين دول ولاد البطة السودا مش بينزلهم غير بواقي التصدير!

  • المصنع عشان يعملك حاجة لازم تطلب كميات كبيرة

ودة طبيعي عشان تاخد بسعر المصنع

  • لما تتعامل مع مصنع خليك محترف

ما تتعاملش بشكل ودي اكتر من اللازم.. يعني الشغل شغل وله قواعد للتعامل

يعني مثلا لو اديته عربون خد وصل يثبت حقك

وما تدفعش باقي المبلغ غير لما تستلم حاجتك وتفرزها وتتأكد انها مطابقة للمواصفات اللى انت طالبها ومافيهاش عيوب

(ملحوظة: هناك هامش للعيوب يعني مثلا ممكن تاخد 100 قطعة يطلعلك 3 الى 5 قطع فيهم عيوب لكن اكتر من كدة ما تقبلش تستلم البضاعة)

  • اطلب عينة الأول

لما تعوز تعمل حاجة خليه الاول يعملك عينة وبعد ما تاخد العينه جربها وخد وقتك لأن دة الشغل اللى هتبني عليه اسمك في السوق فما تخاطرش بسمعتك

  • ما تسترخصش

ايوة بلاش تسترخص وتروح للمصنع اللى سعره ارخص او بيبيع خامات ارخص .. دي نصيحة مني لو عايز تعمل اسم كويس في السوق لما هتوفر جنيه ولا اتنين في القطعة لكن الجودة هتطلع سيئة او الخامة وحشة انت اللى هتخسر في النهاية لأن اللى هيشتري مرة مش هيشتري تاني … لما واحد بييجي يشتري مني اول مرة بياخد تي شيرت واحدة وبعد ما بيجربها بيرجع تاني ويشتري 4 او 5 قطع مرة واحدة لكن لو الجودة كانت وحشة كان هيشتري ويجري ما يرجعش تاني وهكون انا وفرت5 أو 10 جنيه في القطعة لكن خسرت الطلبيات التانية اللى كانت ممكن تيجي من نفس العميل دة غير انه كان هيقول لصحابه وهكذا

فيه قصة جميلة جدا سمعتها في اسبوع شباب الأعمل لأحد رجال الأعمل.. كان بيقول انه كان بيعمل منتجات جلدية ويعرضها على مستوردين في انجلترا لكن كانوا بيقولوا له سعرك غالي .. فيروح يشتري ارخص خامة وارخص اكسسوار ويصنع المنتج تاني ويعرضه عليهم تاني.. يقولوا له سعرك غالي

وفي مرة سأل واحد الماني قال له ايه الحكاية الناس الانجليز عمالين يقولوا لي سعرك غالي سعرك غالي .. اعمل ايه؟

قال له لأن انت بتحاول تنافس الصيني والتايواني لكن لو انت عايز تشتغل كويس نافس الألماني والحاجات المعروفة بجودتها العالية.. راح اشترى اغلى انواع الجلود واغلى انواع الاكسسوارات وعمل منتج وعرضه عليهم قالوا له سعرك حلو جدا .. بالرغم من ان السعر المرة دي أصبح ضعف السعر القديم لكن مقارنة بجودة المنتج يعتبر سعر هايل!

  • المصانع مش هتحبك

ايوة للأسف الطريقة اللى بقولك عليها دي هتخليك عميل مش مرغوب فيه عند بعض المصانع وخاصة المصانع اللى فاكرة انها ممكن تديك اى حاجة وخلاص وانت تاخدها وانت ساكت وتبوس ايدك شعر ودقن انهم رضيوا يتعاملوا معاك اصلا لأن انت مازلت مستثمر صغير وطلباتك تعتبر قليلة بالنسبة لهم

بس الحمد لله الطريقة دي هى اللى خليتنا نكون اعلي متجر تيشيرتات عنده تقييم ايجابي في نهاية هذا الموسم على موقع سوق.كوم

الأوسمة: , , , ,

أفضل طريقة للدفع في الشرق الأوسط

11 July, 2010 | 8 تعليقات | مصنف في تجارة إلكترونية

الدفع عند الاستلام طبعا

لأ.. غلط

الطريقة دي احنا عايزين ننسفها اصلا .. ماحدش بقى بيستعملها في التجارة الالكترونية غيرنا للاسف الشديد… ولو فضلنا نستعملها يبقى عمرنا ما هنستعمل الدفع الالكتروني اللى هو من اساسيات التجارة الالكترونية

مش عارفة ليه محسسيني اننا متخلفين او اقل من غيرنا ولازم يكون لينا طرق دفع مخصوصة .. زى ما يكون معانا شهادة مكتوب عليها :”يعامل معاملة الأطفال،ما تخلوهوش يدفع على النت”!

للأسف الطريقة دي لو فضلنا ماشيين عليها ممكن نقضي على التجارة الالكترونية خالص… ازاى؟

هقول مثال بسيط: في ناس بتطلب مني تي شيرتات عن طريق سوق وبعد فترة لقيت شوية تي شحنات رجعت لى تاني بدون حتى ما تتفتح وما اتسلمتش فلما سألت ايه السبب قالولي واحد رجع في كلامه والتاني قال ماعوش فلوس! والتالت مش بيرد على موبايله وهكذا

خدوا بالكم بقى في كام واحد اتضر بسبب ان الناس دي بتهزر

  • انا اخدت الموضوع جد وطبعت التيشيرتات ودة كلفني وقت ومجهود وفلوس
  • أرامكس اخدت الموضوع جد وجت خدت مني الشحنة عشان توصلها ودة كلفهم وقت ومجهود وفلوس
  • سوق اخد الموضوع جد وكلم العميل اكد عليه قبل ما الطلب يطبع وبعدين لما الطلب ما اتوصلش سوق هو اللى اتحمل مصاريف الشحنة اللى اتاخدت من عندي ورجعت لى تاني .. ودة طبعا كلفهم وقت ومجهود وفلوس

كل اللى حصل دة بسبب الدفع عند الاستلام … لو واحد دفع ثمن السلعة على النت مقدما هيرد على تليفونه وهيقعد يستنى شركة الشحن عشان يستلم شحنته لأنها لو رجعتلى هو اللى هيتحمل مصاريف شحنها مرة اخرى

واحدة قريبتي كانت بتجيب حاجات من برة للناس وتخليهم يدفعوا بعد ما يستلموا لكن بردو للأسف في ناس كانت بعد ما هى تشتري الحاجة وتشحنها من امريكا وتدفع جماركها كانوا يقولولها لأ مش عايزين! وكانت بتضطر تعرض الحاجت دي للبيع وهى وحظها بقى

لو المواقف دي فضلت تتكرر للأسف في ناس كتير ممكن تبطل تشتغل من على الانترنت لأن الموضوع هيكون خسارته اكتر من ربحه

طب ايه الحل؟

الحل اننا نكون زينا زى كل البلاد التانية اللى بطلت تستعمل الطريقة دي… كتير جدا بلاقى مواضيع بعنوان:”أفضل طرق الدفع في العالم العربي”  ومناقشات عن ايه الطرق البديلة للدفع الالكتروني.. بصراحة بزعل جدا وبحس اننا للدرجة دي متأخرين لدرجة اننا عايزين نخترع لنا طرق مخصوصة؟

افضل طرق للدفع على النت في العالم العربي هى نفس طرق الدفع في العالم كله.. احنا مش ناقصين ايد ولا رجل

ولو موقع زى Paypal مش عايز يضيفنا احنا المفروض يكون عندنا القدرة اننا نعمل خدمة مماثلة ليه تساعد التجارة الالكترونية في العالم العربي بدل ما تموت قبل ما تبدأ . واصلا في مواقع غيره بتقبل الدول العربية زى Moneybookers مثلا .

هناك طريقة أخرى وهى الدفع عن طريق شبكات المحمول ودي انا لقيت مواقع بتقدمها لكن للأسف العمولة كانت عالية جدا يعني تصل الى 35%  ودة طبعا كتير جدا .. فلو شركات المحمول تعاونت في الموضوع دة ووفرت طريقة للدفع عبر كل الشبكات بعمولة معقولة دة هيكون حل هايل جدا وهيفتح سوق جديدة للشبكات دي

بعض المعوقات التي تقابل الناس في الدفع الالكتروني:

  • انا مش عندي حساب في البنك ازاى هدفع على النت

كنت كتبت مقال قبل كدة عن كروت الفيزا مسبقة الدفع مش بتحتاج يكون ليك حساب.. دي عاملة زى كروت شحن الموبايل كدة بتشحنها وتصرف اللى فيها ومش هيكون عليك اى ديون للبنوك.. انا شخصيا عندي اتنين وبشتري بيهم من امريكا وحتى مرة موقع كان ما بيقبلش كروت من خارج امريكا بردو قلت اجرب حظي ودفعت بيها ونفع 🙂  واشتريت من عليه بس حطيت العنوان بتاع صندوقي في ارامكس في امريكا بدل عنواني في مصر … مشي حالك يعني

  • انا خايف استعمل الكارت يتسرق رقمه

الكارت المسبق الدفع مش بينفع حد يشتري بأكتر من الفلوس اللى موجودة عليه فأفضل شيء انك تتركه فاضي طوال الوقت فحتى لو اتسرق رقمه مش هيلاقوا حاجة يسرقوها ولما تحب تشتري حاجة تشحنه وتستعمله علطول ويفضل انك ما تشتريش من مواقع غير موثوق فيها

  • انا مش واثق في البائعين على النت

الموضوع دة مهم جدا ودة اكبر دليل على اننا لو استعملنا طرق الدفع الالكترونية دة هيساهم في الرقى بالتجارة الالكتروينة لأن كل بائع هيكون عايز يبني ثقة بينه وبين المستهلكين والبائع اللى مش هيكون معروف بامانته محدش هيشتري منه .. فكل واحد هيقدم احسن خدمة عشان يجذب الناس لمتجره

لكن اذا كنت غير واثق في البائع يمكنك الشراء عن طريق موقع مثل Souq.com وهو بيكون وسيط بينك وبين البائع مقابل عمولة من البائع فقط ومش بيخلي البائع ياخد الفلوس الا بعد استلامك للسلعة

اتمنى ييجي اليوم اللى نبقى فيه زى الدول الأخرى ومش اقل منهم وتكون التجارة الالكترونية جزء اساسي من تعاملاتنا التجارية ويكون المستهلك العربي على درجة كبيرة من الوعى والجدية اللى تخليه لا “يعامل معاملة الأطفال”. والكلام دة مش معناه ان نسبة الناس اللى بتهزر ومش واخدة الموضوع جد عالية .. لا والله ابدا النسبة الأغلب محترمين جدا وجادين في معاملاتهم لكن لاحظ اننا لازلنا في البداية ومع ازدياد حجم التجارة هيزداد عدد المواقف اللى زى دي فلو تاجر صغير هيتحمل كل يوم مصاريف شحنة واحدة مثلا على الأقل دة معناه خسارة 600 جنيه في الشهر

الأوسمة: , , , ,

فوائد البيع عن طريق مول تجاري على الإنترنت

14 May, 2010 | 7 تعليقات | مصنف في تجارة إلكترونية

بصراحة؟

أنا كنت بحسد الأمريكان!  أيو الله كنت بحسدهم.

مش بس عندهم وسيلة دفع سهلة وآمنة مثل Paypal اللى احنا محرومين منه. كمان عندهم مواقع زى e-bay و Amazon بيقدروا يبيعوا عن طريقها بسهولة و يحققوا مكاسب مهولة من التجارة الالكترونية

ما نجدش الأمريكان من الحسد بتاعي غير إعلان شاهدته على فيسبوك -واكيد معظمكم شافه- عن مزادات على موبايلات تبدأ من جنيه واحد. طبعا دفعني الفضول اني ادخل واشوف. لقيت الموقع عبارة عن مول تجاري فيه سلع كتير معروضة للبيع وبعضها عليه مزادات. قلت عادي يعني الناس بتبيع عن طريقه وخلاص.لكن اللى اكتشفته انه مش موقع عادي تضع فيه بضاعتك والناس تطلبها وخلاص على كدة ، دة طلع منظومة متكاملة لها قوانين صارمة معمولة مخصوص عشان تسهل عملية التجارة الالكترونية في العالم العربي عن طريق نظام يعرف بالدفع الآمن اوSafePay

كيف يعمل هذا النظام؟

باختصار يحمي هذا النظام المشتري-وهو أكثر واحد تجب حمايته- عن طريق أخذ موقع سوق ثمن السلعة منه وعدم توصيل المبلغ للبائع الا بعد موافقة المشتري على السلعة او عدم الشكوى منها وطلب ارجاعها. في الوقت نفسه النظام بيوفر حماية ايضا للبائع عن طريق ضمان وصول الأموال اليه بعد استلام المشتري للسلعة

فوائد هذا المول للمشتري

  • الشراء بسهولة وبدون مخاطر عن طريق الإنترنت
  • المقارنة بين أسعار التجار المختلفين واختيار أفضل سعر
  • إمكانية الدفع عند الاستلام
  • امكانية الدفع بكروت الفيزا دون القلق من البائع لأنك بتدفع لسوق وليس للبائع
  • نظام التقييم يجعل هناك مصداقية تمكن المشتري من معرفة سمعة التاجر قبل الشراء منه

فوائد هذا المول للبائع

  • زيادة عدد الزاور وبالتالي زيادة المبيعات (بشكل كبير وعن تجربة شخصية): واحدة صاحبتي قالت لى ان ثمن إيجار “كشك” صغير في سيتي ستارز (الاكشاك اللى على الممرات دي) بيكون تقريبا عشرة آلاف جنيها في الشهر! ولما حسبنا جدوى هذا الموضوع وجدنا انه ممكن اوي يكون مربح ببساطة لأن عدد زوار مول كبير مثل سيتي ستارز أكيد هيكون أكبر من عدد زوار محلك الخاص لو فتحته في شارع مش معروف وبالتالي هذا الكم الهائل من الناس اللى هيشوف سلعتك واكيد في منهم جزء هيشتري هيزيد مبيعاتك بشكل كبير. وبصراحة صاحبتي قالت لى جملة منطقية ،قالت لى انا بشوف ناس في الاكشاك دي بيبيعوا ايشاربات يعني اكيد لو العملية مش جايبة همها ماكانوش هيصرفوا كل الفلوس دي على ايجار الكشك! ودة بالظبط الفرق بين انك تبيع عن طريق موقعك الخاص فقط وبين انك تبيع في مول تجاري على الانترنت وهو: زيادة عدد الزاور
  • وجود عامل الأمان الذي يزيد الثقة عند المشتري وبالتالي يقبل على الشراء منك
  • التوفير في ميزانية الدعاية والاعلان: انت لما بتعمل حملة اعلانية (بغرض البيع وليس بغرض ال Branding) بتحاول تستهدف الناس اللى عندها نية الشراء عشان ما تصرفش فلوس الاعلانات على الفاضي وخصوصا لو ميزانيتك محدودة لانك مشروع صغير.الميزة في المول اولا ان هو نفسه بيعمل اعلانات عن نفسه! وثانيا ان الناس اللى بتزور المول غالبا بتدخل عشان عندها نية الشراء -واحد داخل مول تجاري داخل يعمل ايه يعني؟ مفيش بنات تتعاكس هنا- او على الاقل مهتمة انها تشوف ايه المعروض وفيه احتمالية كبيرة جدا عندها انها تشتري. فلو سلعتك جيدة وبسعر منافس ان شاء الله هتتباع
  • يمكن لأى واحد انه يبيع عن طريقه مش شرط يكون تاجر حتى لو عندك في البيت سلعة مستعملة عايز تبيعها بشرط ان تبين ذلك بصدق
  • يمكنك فتح متجر الكتروني Store في هذا المول ويكون عليه العلامة التجارية بتاعتك وتعرض فيه السلع بشكل منظم
  • توفير حجم الجهد المبذول في التأكد من جدية الطلب ومكالمة المشترين ومعرفة المقاسات المطلوبة والتأكد من البيانات لأن سوق يقوم بهذه المهمة نيابة عنك (بصراحة الله يكون في عون اللى بيشتغلوا في سوق بيشيلوا العبئ دة من عليا :)وعشان كدة بحب ابيع عن طريقهم اكتر ما ببيع عن طريق موقعي). فيه موقع آخر جربت أعرض عليه ولكن عشان مفيش متابعة لعملية الشراء من الادارة فكل الطلبات اللى جاءتني عن طريقه بلا استثناء كانت طلبات غير جادة يعني مثلا واحد بعد ما طلب وكلمته قال لى انا كنت بجرب الموقع بس 🙂 وواحد تاني قال لى طب هشوف المقاس وارد عليكي وما ردش وانا طبعا ما اتصلتش تاني.
  • لأول مرة تجتمع كل عوامل التجارة الالكترونية في مول عربي واحد: العرض-الشراء-الدفع-الشحن . كله عن طريق نفس الموقع
  • ضمان استلام أموالك من المشتري: جاءني تعليق يسأل عن مخاطر التجارة عن طريق الانترنت (بالنسبة للتاجر) فرويت له ما يحدث أحيانا على ال Paypal من عمليات نصب من قبل بعض المشترين الذين يستغلون نظام الحماية هناك ويقومون بعد استلام السلعة بالابلاغ عن انهم لم يستلموا شيئا ويطالبون باسترداد اموالهم من محفظة البائع وبذلك يخسر البائع السلعة والأموال. في حالة سوق هذه الحماية متوفرة للبائع لأن سوق نفسه هو من يقوم بالشحن عن طريق شركة متعاقد معها وبالتالي لا يمكن للمشتري انكار استلامه للسلعة
  • مساعدة فريق العمل لك في انجاح مشروعك: منذ عدة أيام ارسل الى فريق العمل بفكرة هايلة جدا تصلح للمشروع بتاعي وانا استغربت ازاى الفكرة دي ما جاتش على دماغي لكن دي ميزة احب اضيفها وهى ان بيكون في حد عايز يساعدك انك تنجح ببساطة لان نجاحك دة هينعكس على نجاح الموقع وانت لما بتعمل مشروع صغير بتكون لوحدك وبالتالي افكارك محدودة مقارنة بافكار فريق متكامل متخصص في مجال التجارة الإلكترونية

مفيش شك انك لما يكون عندك موقعك الخاص فدة بيجعل لك وجود مستقل وبشكل محترف على الانترنت لكن بردو ليس هناك ما يمنع ان تحاول زيادة مبيعاتك عن طريق مول تجاري الكتروني.فإن توفرت لك إمكانية الجمع بين الاثنين فدة يكون شيء ممتاز طبعا وان لم يكن يمكنك حساب ايهما افضل لتجارتك والاختيار بينهما. وأعتقد انه بالنسبة للناس اللى بتبيع عن طريق جروب على الفيس بوك المول هيكون حاجة مفيدة ليهم جدا عشان ممكن يفتحوا متجر او يعرضوا السلع بشكل منظم اكثر ويكون هناك حل شامل للشراء والدفع والشحن وبالتالي الناس تشتري بسهولة

الأوسمة: , , , ,