| اشترك عبر RSS

يعني إيه تي شيرت أورجانيك ؟

07 July, 2011 | 1 تعليق | مصنف في تي شيرت

الناس متعودة على الخضار الأورجانيك والفاكهة الأورجانيك.. لكن تيشيرت ؟

أه ..ما هو التي شيرت معمول من قطن اللى هو محصول زراعي بردو .. ومعظم الناس ما تعرفش ان القطن هو ثاني اكثر محصول استهلاكا للمبيدات بعد القهوة!

فباختصار تي شيرت أورجانيك يعني مصنوعة من قطن لم يدخل في زراعته مبيدات

هل شرائي لتي شيرت أورجانيك سيعود بالنفع على صحتي ؟

بصراحة هو النفع على صحتك سيكون بطريقة غير مباشرة وليست مباشرة مثل أكلك لفاكهة اورجانيك.. فعندما تشتري تي شيرت أورجانيك ستشجع زراعة القطن بدون مبيدات لأن الطلب سيزيد على هذه السلعة وهو ما سيعود بالنفع على بيئتك لأنه سيقلل من وجود هذه الكيماويات في الهواء والماء والتربة وبالتالي فسيعود ذلك على صحتك في النهاية.

لكن هذا سيعود بالنفع المباشر على صحة المزارعين الذين يعملون في زراعة القطن ويتعرضون لهذا الكم الهائل من المبيدات التي تضر ضررا بالغا بصحتهم

وهو أيضا سيعود بالنفع على البلدان النامية التي تستخدم لزراعة مثل هذه المحاصيل فتلوث التربة والماء والهواء لهذه البلدان

ما الذي يمنع المزارعين من زراعة القطن بدون مبيدات في الأساس؟

مثل أى سلعة في الدنيا فالقطن يخضع للعرض والطلب.. من المعروف ان الزراعة بدون مبيدات مكلفة جدا ولذلك تجد اسعار الخضروات والفاكهة الاورجانيك عالية لأنها تحتاج الى رعاية خاصة وطرق مخصوصة للحصول على منتج عالي الجودة وبدون آفات وفي نفس الوقت بدون مبيدات

  المزارعون لا يستطيعون زراعته بدون مبيدات الا اذا كان هناك طلبا عليه من التجار فبالتالي لازم يكون عليه طلب من المستهلك في الاصل حتى يطلبه التجار فيستطيع المزارع زراعته وبيعه بالسعر المناسب

هل سأشعر باختلاف بارتدائي هذا التي شيرت لأنه أورجانيك ؟

خامة التي شيرت كما ذكرنا من قبل تعود بالاصل على طريقة غزل القطن ..نفس الكلام ينطبق على القطن الأورجانيك اذا وجدته قطن ممشط او combed ring spun cottonفهذا معناه ان الخامة هتكون ناعمة ومريحة في اللبس مثلها مثل التي شيرت العادية المغزولة بنفس الطريقة

الإختلاف الذي ستشعر به فعلا هو انك قد ساهمت في جهود الحفاظ على بيئتك بدعمك لمثل هذه المنتجات واقبالك عليها

 

الأوسمة: ,

تحيا الصناعة المصرية

11 November, 2010 | 6 تعليقات | مصنف في تجارة إلكترونية

صنع في مصر

الاسبوع اللى فات كنت بحضر محاضرة منظمها موقع سوق.كوم ضمن فعاليات الاسبوع العالمي لشباب الأعمال وكانوا مستضيفين شباب بيبيعوا على سوق عشان يحكوا تجربتهم. اللى لفت نظري في الموضوع دة ان كل المنتجات اللى الشباب دول بيبيعوها ونجحوا في تقديمها للسوق المصري وعجبت الناس هى منتجات مصرية عاملها شباب مصريين سنهم لا يتعدى الثلاثينات او حتى العشرينات

كتير جدا بتوصلني عروض عن طريق موقع علي بابا او موقع لينكد إن من مصانع خارج مصر عشان يصنعولي حاجتي بجودة عالية وطبقا للمواصفات اللى انا احددها لكن دايما برفض (حتى الآن) لسبب واحد وهو ان أصلا كثير جدا من الماركات العالمية بتتصنع هنا في مصر! يعني احنا عندنا مصانع قادرة على تصنيع منتجات عالية الجودة.. ايه اللى يخليني اطلب من مصانع خارج مصر ؟

طبعا هذا لا ينطبق على جميع الصناعات لكن لما يكون المنتج اللى انت عايز تشتغل فيه ممكن يتصنع في مصر صنعه في مصر مع مراعاة بعض الأشياء اللى هقول عليها لعل البعض يستفيد من تجربتي:

  • مش عيب انك تصنع عند الغير

في اسئلة وردت للشباب بتقولهم ليه مش عندكوا مصانع بتاعتكم

الاجابة ببساطة: ايه اللى يجبرهم على كدة؟ دلوقتي اكبر الماركات قفلت مصانعها وبقت بتصنع عند الغير زى ما ذكرنا ان فيه منهم بيصنع في مصر يعني الماركات دي لا تملك مصانع ودة لأنهم وجدوا ان دي افضل طريقة تناسب شغلهم ومجدية ماديا

ايه اللى يخليك تتحمل عبئ مصنع وعمال ومرتبات وتشتري مكان وتدفع مرافق في حين ان فيه مصانع موجودة وجاهزة وممكن تعملك اللى انت عايزه وبالمواصفات بتاعتك وبعد كدة انت تبيعه في متجرك

  • مش كل المصانع المصرية هتوافق تتعامل معاك

اول ما عملت اعلان في علي بابا في واحد كلمني وسألني سؤال واحد

قال: انتي بتشتغلي تصدير؟

قلت: لأ بشتغل في السوق المحلي

قفل السكة في وشي!

طب انا دلوقتي مش فاهمة مشكلتك.. مادمت انا هاخد منك بضاعة وادفعلك تمنها ايه المشكلة لما انزلها سوق محلي ولا المصريين دول ولاد البطة السودا مش بينزلهم غير بواقي التصدير!

  • المصنع عشان يعملك حاجة لازم تطلب كميات كبيرة

ودة طبيعي عشان تاخد بسعر المصنع

  • لما تتعامل مع مصنع خليك محترف

ما تتعاملش بشكل ودي اكتر من اللازم.. يعني الشغل شغل وله قواعد للتعامل

يعني مثلا لو اديته عربون خد وصل يثبت حقك

وما تدفعش باقي المبلغ غير لما تستلم حاجتك وتفرزها وتتأكد انها مطابقة للمواصفات اللى انت طالبها ومافيهاش عيوب

(ملحوظة: هناك هامش للعيوب يعني مثلا ممكن تاخد 100 قطعة يطلعلك 3 الى 5 قطع فيهم عيوب لكن اكتر من كدة ما تقبلش تستلم البضاعة)

  • اطلب عينة الأول

لما تعوز تعمل حاجة خليه الاول يعملك عينة وبعد ما تاخد العينه جربها وخد وقتك لأن دة الشغل اللى هتبني عليه اسمك في السوق فما تخاطرش بسمعتك

  • ما تسترخصش

ايوة بلاش تسترخص وتروح للمصنع اللى سعره ارخص او بيبيع خامات ارخص .. دي نصيحة مني لو عايز تعمل اسم كويس في السوق لما هتوفر جنيه ولا اتنين في القطعة لكن الجودة هتطلع سيئة او الخامة وحشة انت اللى هتخسر في النهاية لأن اللى هيشتري مرة مش هيشتري تاني … لما واحد بييجي يشتري مني اول مرة بياخد تي شيرت واحدة وبعد ما بيجربها بيرجع تاني ويشتري 4 او 5 قطع مرة واحدة لكن لو الجودة كانت وحشة كان هيشتري ويجري ما يرجعش تاني وهكون انا وفرت5 أو 10 جنيه في القطعة لكن خسرت الطلبيات التانية اللى كانت ممكن تيجي من نفس العميل دة غير انه كان هيقول لصحابه وهكذا

فيه قصة جميلة جدا سمعتها في اسبوع شباب الأعمل لأحد رجال الأعمل.. كان بيقول انه كان بيعمل منتجات جلدية ويعرضها على مستوردين في انجلترا لكن كانوا بيقولوا له سعرك غالي .. فيروح يشتري ارخص خامة وارخص اكسسوار ويصنع المنتج تاني ويعرضه عليهم تاني.. يقولوا له سعرك غالي

وفي مرة سأل واحد الماني قال له ايه الحكاية الناس الانجليز عمالين يقولوا لي سعرك غالي سعرك غالي .. اعمل ايه؟

قال له لأن انت بتحاول تنافس الصيني والتايواني لكن لو انت عايز تشتغل كويس نافس الألماني والحاجات المعروفة بجودتها العالية.. راح اشترى اغلى انواع الجلود واغلى انواع الاكسسوارات وعمل منتج وعرضه عليهم قالوا له سعرك حلو جدا .. بالرغم من ان السعر المرة دي أصبح ضعف السعر القديم لكن مقارنة بجودة المنتج يعتبر سعر هايل!

  • المصانع مش هتحبك

ايوة للأسف الطريقة اللى بقولك عليها دي هتخليك عميل مش مرغوب فيه عند بعض المصانع وخاصة المصانع اللى فاكرة انها ممكن تديك اى حاجة وخلاص وانت تاخدها وانت ساكت وتبوس ايدك شعر ودقن انهم رضيوا يتعاملوا معاك اصلا لأن انت مازلت مستثمر صغير وطلباتك تعتبر قليلة بالنسبة لهم

بس الحمد لله الطريقة دي هى اللى خليتنا نكون اعلي متجر تيشيرتات عنده تقييم ايجابي في نهاية هذا الموسم على موقع سوق.كوم

الأوسمة: , , , ,