| اشترك عبر RSS

ماذا تفعل عندما يحفر الجميع بحثا عن الذهب

06 October, 2010 | 1 تعليق | مصنف في تجارة إلكترونية

هتعمل ايه؟

هتعمل ايه لو كل الناس طلعوا يجروا على مكان بيقولوا ان فيه ذهب تحت الأرض؟

طبعا هتطلع تجري وراهم

اتفرجت على فيديو في الأجازة بيحكي قصة لطيفة جدا وبيطلع منها درس مهم للناس اللى دايما بتسأل طب انا عايز اعمل مشروع ابيع ايه؟

بيقولك زمان في واحد لقى ذهب في منطقة في كاليفورنيا وحصلت ضجة حوالين الموضوع دة وبدأ الناس يأتون من كل مكان بحثا عن الذهب وأملا في الوصول الى الثراء. لكن في الحقيقة الناس اللى استفادت وكسبت مش الناس اللى كانت بتحفر وتدور على الذهب. لأ . اللى كسبوا هما الناس اللى كانت بتبيع لهم أدوات الحفر 🙂

نظرية مش كدة؟

عشان كدة طلعت مقولة بتقول :” عندما يحفر الجميع بحثا عن الذهب كن انت من يبيع المعاول”

طب نستفاد ايه من النظرية دي؟

حاول تطبقها على وقتنا الحالي.. يعني هو الراجل في الفيديو ذكر امثلة منها مثلا الآي باد .. لما طلع بقت ناس كتيرة جدا عايزة تشتريه فالتاجر الذكي هو اللى ينتهز هذه الفرصة ويبيع اكسسوارات الآي باد زى الجراب مثلا … اعتقد الآي باد مش منتشر اوي عندنا زى هناك لكن مثلا ممكن المثال يطبق على البلاك بيري او الآى فون او الموبايلات بشكل عام لأن نسبة انتشارهم اعلى

ممكن كمان يطبق بشكل آخر بالنسبة للموبايلات عن طريق عمل وبيع تطبيقات الموبايلات… دلوقتي الهواتف دي ليها تطبيقات كتيرة جدا لكن قلما تجد تطبيقات خاصة بالعالم العربي او تطبيقات باللغة العربية

ايضا يمكن الاستفادة بهذا المبدأ في تقديم الخدمات .. احنا ذكرنا في انواع الشغل على الانترنت ان مش شرط انك تبيع سلعة لكن ممكن تقدم خدمة

مثلا دلوقتي فيه ناس كتير جدا نفسها تعمل مشاريع تجارية على الانترنت بس مش عندها خبرة تقنية في انشاء المواقع وسلة التسوق ممكن واحد يعمل مشروع عبارة عن سلة تسوق او موقع متكامل يستطيع الناس البيع من خلاله مقابل ايجار شهري نظير الاستضافة والبرنامج. يعني مثلا انا اشتري الدومين بتاعي واربطه بحسابي على موقع التسوق اللى انت عامله ويبقى ليا محل مخصوص بعنوان مخصوص لكن دون الدخول في متاهات البرمجة والسكريبتات مقابل اشتراك شهري

او مثلا احنا عندنا ازمة في طرق الدفع وانا شخصيا شايفة ان دي فرصة عظيمة جدا لشركات المحمول انها تستغل الحاجة دي لتحقيق مكاسب كبيرة جدا مقابل توفير طريقة للدفع بين الناس عن طريق ارقام التليفون

يعني مثلا انت هتشتري مني حاجة فتقوم بتحويل المبلغ المطلوب عن طريق رصيدك على التليفون وشركة المحمول تسمح لى بسحب هذا المبلغ كاش لأني طبعا مش هحتاج كل الرصيد دة لعمل مكالمات لكن نحتاج الى امكانية السحب كاش … هى شركة فودافون كانت عاملة النظام دة لكن للأسف إتلغى من فترة قريبة معرفش ليه .. يمكن كان فيه صعوبات في تطبيقه .. الله اعلم

طبعا شركة المحمول هتاخد نسبة مثلا 5% فتخيل لو كل عملية بيع تمت عن طريق الانتنرت في مصر أخدت عليها الشركة 5% هيكون مكسبها كبير ازاى

الخلاصة انك بتشوف منتج او حاجة عليها طلب شديد وبتحاول تبيع حاجة ترتبط بالمنتج دة ارتباط ثانوي زى الامثلة اللى ذكرناها وطبعا لو عصرت مخك ممكن تطلع افكار حلوة اكتر بس المهم لما تلاقي الجميع بيجري عشان يحفر ويدور عن الذهب ما تجريش وراهم

وفتكم بعافية

الأوسمة: , , ,

صفحة المليون دولار

23 June, 2010 | 247 تعليقات | مصنف في تجارة إلكترونية

إمبارح قرأت قصة جميلة جدا كنت اول مرة اسمع عنها بالرغم ان مضى عليها تقريبا خمس سنوات .. لكن فعلا عجبتني اوي لسبب واحد وهو انها بتوريك ازاى فكرة بسيطة جدا ممكن تنجح نجاح كبير جدا

القصة عن ولد كان عمره 21 من خمس سنوات وكان مش عارف يجيب مصاريف جامعته منين وماكنش عايز ياخد قرض ويكون عليه ديون بعد التخرج فجلس في سريره ذات ليلة و أخذ يفكر ويفكر ويفكر … ومرة واحدة طقت في دماغه فكرة

الفكرة بسيطة جدا وهى عبارة عن: صفحة المليون دولار

قرر انه يعمل صفحة على الانترنت ويقسمها الى مليون بيكسل ويعرضهم للايجار كمساحة اعلانية لمدة خمس سنوات بسعر واحد دولار للبيكسل وفعلا الناس بدأت تشتري مساحات اعلانية وفي اقل من خمس شهور كان باع كل المليون بيكسل وكسب مليون دولار!!

أرى ان الفكرة دي نجحت لعدة اسباب

  • انها فكرة جديدة ما اتعملتش قبل كدة ولو اتعملت بعد كدة مش هتنجح نفس النجاح دة لو نجحت اصلا
  • انه كان واثق جدا من نفسه ومن نجاح فكرته وانها فكرة عبقرية ودة اعطى انطباع للناس ان فكرته فعلا حلوة وخلاهم يشتروا عنده ودة يبان في الجملة اللى كاتبها في الواجهة Own a piece of internet history اى اقتني جزءا من تاريخ الانترنت.
  • مش كل حاجة قروض!! ايوة مش كل ما يكون حد عايز يعمل مشروع اول حاجة يفكر فيها القروض .. عايز يجيب عربية ياخد قرض العربية.. عايز شقة يبقى تمويل عقاري.. وفلقونا باعلانات الصندوق الاجتماعي طول النهار عشان يخلوا الشباب ياخدوا قروض.. القروض دي بتخرب البيوت .أعرف واحد كان عنده مشروع ماشي كويس اوي وبدأ يثبت نفسه فواحد راح قال له خدلك قرض وتوسع في الشغل بتاعك عشان تكبر اسرع فكانت دي بداية السقوط.. اخد قرض وبدأ ياخد شغل اكبر منه وما خلصش اى حاجة وتراكمت عليه ديون الفوائد وكان هيدخل السجن !
  • انه استثمر في فكرة .. لاحظ ان رأس ماله هو فكرته يعني ما عندوش حاجة يخسرها لو المشروع ما نجحش
  • سقف طموحه كان عالي .. اكيد هو مش محتاج مليون دولار عشان يدفع مصاريف الجامعة .. هو قال انا قلت مليون دولار عشان لو جه 1-2% منهم يكفوا المصاريف ولو جه اكتر اهو اشتري شرابات 🙂
  • وليه لأ؟ دايما لما تجيلك فكرة مشروع امشي معاها للآخر وادرسها اكتر وخصوصا لو مش محتاجة رأس مال كبير . ما تقولش لا يا عم دي فكرة هبلة ومش هتنجح او مش هتعجب الناس وهتتريأ عليا مين عالم مش يمكن تنجح رغم بساطتها.. او يمكن تنجح اصلا عشان بساطتها .. ما هو انت مش لازم عشان تنجح تخترع جهاز جديد.. دايما قول وليه لأ

بالرغم من انك لما تشوف الصفحة تحس انها مزعجة ومليانه اعلانات وغالبا بتدوس على الاعلانات بالغلط من كتر ما هى مرشقة لينكات الا ان في شركات كبيرة اعلنت فيها وفي ناس تانية اشترت جزء صغير جدا صعب يتشاف ودة لانها اصبحت صفحة الناس بتحكي عنها وبتزورها واصبحت فعلا جزءا من تاريخ الإنترنت لأنها بتجسد قصة نجاح شاب صغير لم يمتلك الا فكرة بسيطة

الأوسمة: , ,

فوائد البيع عن طريق مول تجاري على الإنترنت

14 May, 2010 | 7 تعليقات | مصنف في تجارة إلكترونية

بصراحة؟

أنا كنت بحسد الأمريكان!  أيو الله كنت بحسدهم.

مش بس عندهم وسيلة دفع سهلة وآمنة مثل Paypal اللى احنا محرومين منه. كمان عندهم مواقع زى e-bay و Amazon بيقدروا يبيعوا عن طريقها بسهولة و يحققوا مكاسب مهولة من التجارة الالكترونية

ما نجدش الأمريكان من الحسد بتاعي غير إعلان شاهدته على فيسبوك -واكيد معظمكم شافه- عن مزادات على موبايلات تبدأ من جنيه واحد. طبعا دفعني الفضول اني ادخل واشوف. لقيت الموقع عبارة عن مول تجاري فيه سلع كتير معروضة للبيع وبعضها عليه مزادات. قلت عادي يعني الناس بتبيع عن طريقه وخلاص.لكن اللى اكتشفته انه مش موقع عادي تضع فيه بضاعتك والناس تطلبها وخلاص على كدة ، دة طلع منظومة متكاملة لها قوانين صارمة معمولة مخصوص عشان تسهل عملية التجارة الالكترونية في العالم العربي عن طريق نظام يعرف بالدفع الآمن اوSafePay

كيف يعمل هذا النظام؟

باختصار يحمي هذا النظام المشتري-وهو أكثر واحد تجب حمايته- عن طريق أخذ موقع سوق ثمن السلعة منه وعدم توصيل المبلغ للبائع الا بعد موافقة المشتري على السلعة او عدم الشكوى منها وطلب ارجاعها. في الوقت نفسه النظام بيوفر حماية ايضا للبائع عن طريق ضمان وصول الأموال اليه بعد استلام المشتري للسلعة

فوائد هذا المول للمشتري

  • الشراء بسهولة وبدون مخاطر عن طريق الإنترنت
  • المقارنة بين أسعار التجار المختلفين واختيار أفضل سعر
  • إمكانية الدفع عند الاستلام
  • امكانية الدفع بكروت الفيزا دون القلق من البائع لأنك بتدفع لسوق وليس للبائع
  • نظام التقييم يجعل هناك مصداقية تمكن المشتري من معرفة سمعة التاجر قبل الشراء منه

فوائد هذا المول للبائع

  • زيادة عدد الزاور وبالتالي زيادة المبيعات (بشكل كبير وعن تجربة شخصية): واحدة صاحبتي قالت لى ان ثمن إيجار “كشك” صغير في سيتي ستارز (الاكشاك اللى على الممرات دي) بيكون تقريبا عشرة آلاف جنيها في الشهر! ولما حسبنا جدوى هذا الموضوع وجدنا انه ممكن اوي يكون مربح ببساطة لأن عدد زوار مول كبير مثل سيتي ستارز أكيد هيكون أكبر من عدد زوار محلك الخاص لو فتحته في شارع مش معروف وبالتالي هذا الكم الهائل من الناس اللى هيشوف سلعتك واكيد في منهم جزء هيشتري هيزيد مبيعاتك بشكل كبير. وبصراحة صاحبتي قالت لى جملة منطقية ،قالت لى انا بشوف ناس في الاكشاك دي بيبيعوا ايشاربات يعني اكيد لو العملية مش جايبة همها ماكانوش هيصرفوا كل الفلوس دي على ايجار الكشك! ودة بالظبط الفرق بين انك تبيع عن طريق موقعك الخاص فقط وبين انك تبيع في مول تجاري على الانترنت وهو: زيادة عدد الزاور
  • وجود عامل الأمان الذي يزيد الثقة عند المشتري وبالتالي يقبل على الشراء منك
  • التوفير في ميزانية الدعاية والاعلان: انت لما بتعمل حملة اعلانية (بغرض البيع وليس بغرض ال Branding) بتحاول تستهدف الناس اللى عندها نية الشراء عشان ما تصرفش فلوس الاعلانات على الفاضي وخصوصا لو ميزانيتك محدودة لانك مشروع صغير.الميزة في المول اولا ان هو نفسه بيعمل اعلانات عن نفسه! وثانيا ان الناس اللى بتزور المول غالبا بتدخل عشان عندها نية الشراء -واحد داخل مول تجاري داخل يعمل ايه يعني؟ مفيش بنات تتعاكس هنا- او على الاقل مهتمة انها تشوف ايه المعروض وفيه احتمالية كبيرة جدا عندها انها تشتري. فلو سلعتك جيدة وبسعر منافس ان شاء الله هتتباع
  • يمكن لأى واحد انه يبيع عن طريقه مش شرط يكون تاجر حتى لو عندك في البيت سلعة مستعملة عايز تبيعها بشرط ان تبين ذلك بصدق
  • يمكنك فتح متجر الكتروني Store في هذا المول ويكون عليه العلامة التجارية بتاعتك وتعرض فيه السلع بشكل منظم
  • توفير حجم الجهد المبذول في التأكد من جدية الطلب ومكالمة المشترين ومعرفة المقاسات المطلوبة والتأكد من البيانات لأن سوق يقوم بهذه المهمة نيابة عنك (بصراحة الله يكون في عون اللى بيشتغلوا في سوق بيشيلوا العبئ دة من عليا :)وعشان كدة بحب ابيع عن طريقهم اكتر ما ببيع عن طريق موقعي). فيه موقع آخر جربت أعرض عليه ولكن عشان مفيش متابعة لعملية الشراء من الادارة فكل الطلبات اللى جاءتني عن طريقه بلا استثناء كانت طلبات غير جادة يعني مثلا واحد بعد ما طلب وكلمته قال لى انا كنت بجرب الموقع بس 🙂 وواحد تاني قال لى طب هشوف المقاس وارد عليكي وما ردش وانا طبعا ما اتصلتش تاني.
  • لأول مرة تجتمع كل عوامل التجارة الالكترونية في مول عربي واحد: العرض-الشراء-الدفع-الشحن . كله عن طريق نفس الموقع
  • ضمان استلام أموالك من المشتري: جاءني تعليق يسأل عن مخاطر التجارة عن طريق الانترنت (بالنسبة للتاجر) فرويت له ما يحدث أحيانا على ال Paypal من عمليات نصب من قبل بعض المشترين الذين يستغلون نظام الحماية هناك ويقومون بعد استلام السلعة بالابلاغ عن انهم لم يستلموا شيئا ويطالبون باسترداد اموالهم من محفظة البائع وبذلك يخسر البائع السلعة والأموال. في حالة سوق هذه الحماية متوفرة للبائع لأن سوق نفسه هو من يقوم بالشحن عن طريق شركة متعاقد معها وبالتالي لا يمكن للمشتري انكار استلامه للسلعة
  • مساعدة فريق العمل لك في انجاح مشروعك: منذ عدة أيام ارسل الى فريق العمل بفكرة هايلة جدا تصلح للمشروع بتاعي وانا استغربت ازاى الفكرة دي ما جاتش على دماغي لكن دي ميزة احب اضيفها وهى ان بيكون في حد عايز يساعدك انك تنجح ببساطة لان نجاحك دة هينعكس على نجاح الموقع وانت لما بتعمل مشروع صغير بتكون لوحدك وبالتالي افكارك محدودة مقارنة بافكار فريق متكامل متخصص في مجال التجارة الإلكترونية

مفيش شك انك لما يكون عندك موقعك الخاص فدة بيجعل لك وجود مستقل وبشكل محترف على الانترنت لكن بردو ليس هناك ما يمنع ان تحاول زيادة مبيعاتك عن طريق مول تجاري الكتروني.فإن توفرت لك إمكانية الجمع بين الاثنين فدة يكون شيء ممتاز طبعا وان لم يكن يمكنك حساب ايهما افضل لتجارتك والاختيار بينهما. وأعتقد انه بالنسبة للناس اللى بتبيع عن طريق جروب على الفيس بوك المول هيكون حاجة مفيدة ليهم جدا عشان ممكن يفتحوا متجر او يعرضوا السلع بشكل منظم اكثر ويكون هناك حل شامل للشراء والدفع والشحن وبالتالي الناس تشتري بسهولة

الأوسمة: , , , ,