| اشترك عبر RSS

كيف تخسر جميع أموالك في الفوركس ؟

02 April, 2017 | Comments Off on كيف تخسر جميع أموالك في الفوركس ؟ | مصنف في استثمار, تجارة إلكترونية

Forex2

قصة حقيقية: أنا كسبت فلوس كتير أوي في الفوركس!

دخلت بمبلغ معقول و في خلال اسبوع من التداول وصلت لتقريبا ضعف المبلغ

بعد اسبوع آخر خسرت كل اللي كسبته وخسرت ٧٥٪ من رأس المال اللي دخلت بيه

قلت يمكن عشان ليس عندي خبرة فمعرفتش احافظ على اللي كسبته .. مع العلم ان اللي كسبته ماكانش ضربة حظ من صفقة واحدة مثلا لأ أنا فضلت اتداول ايام متتالية بربح كبير وبدون أي صفقات خاسرة.

طيب ايه اللي حصل؟

اللي حصل ببساطة ان هو دة الفوركس! حتحاول تكسب بسرعة هتخسر بردو بسرعة وغالبا هتخسر كل شيء لأنك هتفضل متعلق بالوهم فتحط فلوس كمان وكمان وكمان.

طيب المشهد التاني من القصة:

قلت خلاص يمكن انا ما بفهمش في اللعبة فخلونا ندي العيش لخبازه ونشوف حد يدير لنا الحساب. وبالفعل وجدت على التليجرام قنوات كتير و كل واحد بيروج لنفسه و منهم اللي واضح انه نصاب وش و منهم اللي ما بيفهمش اصلا في اللعبة بس معرفش موجود هناك ليه ومنهم الناس الراسية العاقلة اللي بتحلل و تفهم.

طبعا قلت اروح للي عاقل وفاهم ووجدت احد المحللين اللي بيدعو لادارة الحسابات ويوعدك بربح ٤٠٪ في الشهر

طبعا نسبة الربح اغرتني ونسيت ان ربح كبير يعني ريسك كبير فحطيت معاه مبلغ  يساوي المبلغ اللي دخلت بيه اول مرة

بعد شهر المبلغ تم بالفعل زيادته الي الضعف!! لكن بعد شهر آخر المبلغ خسر كل اللي كسبه وسبحان  الله خسر بردو ٧٥٪ من راس المال

يعني مفيش ربح في الفوركس؟

لأ فيه

وعشان كدة مش هخرج من الفوركس لأن الفرص فيه كبيرة جدا

لكن الطريقة الوحيدة اللي تكسبك في الفوركس اولا انك تعقل و تفكك من وهم تدبيل الحساب كل شهر دة لأن دة لو حصل اول شهر مش هيحصل تاني شهر و غالبا مع تالت شهر هتكون خسرت كل حاجة

الطريقة الوحيدة اللي تكسب بيها على المدى الطويل هى انك تتداول بآحجام مناسبة لحجم الحساب بتاعك فتكون لما بتكسب بتكسب قليل و لما بتخسر بتخسر أقل ولو مكاسبك اكثر من خسايرك هتكبر صدقني

لو حققت ربح فقط ٦٪ في الشهر حسابك هيتدبل بعد سنة! هاتلي أي بنك او مشروع يعطيك ١٠٠٪ ربح في سنة على استثماراتك وفلوسك تتضاعف كل سنة .

سيبك من النصب اللي بيحصل علي تليجرام

بص معايا على السكرين شوت دة كدة

forex win

آنا ممكن اعملك شوت زي دة و مش فوتوشوب ولا حاجة. ببساطة هدخل شراء و بيع على نفس العملة واول ما يوصل لرقم كبير زي دة هقفل الصفقة الخسرانة و اصور الكسبانة واتفضل شوف انا عملت كام. و بالمناسبة هو داخل ب ١٠ لوت يعني النقطة الواحدة ب ١٠٠ دولار يعني لو راحت ضدك ١٠٠ نقطة  هتروح وترجع مش هتلاقيك لأنك هتكون روحت مع اللي راحو قبلك

نصيحة أخيرة: انصحك انك تتداول على حسابك بنفسك لأن محدش هيخاف على فلوسك آكتر منك ولو لابد تخلي حد يديرلك حسابك لازم تطلب منه باسوورد حساب مشاهدة يكون هو بيديره وتدخل تتفرج على الصفقات الي بيدخلها و احجامها ونسبة المخاطرة اللي بياخدها و الدروداون بتاع الحساب