| اشترك عبر RSS

تطبيقات تخلي صفحتك جامدة

25 July, 2010 | 81 تعليقات | مصنف في شبكات إجتماعية

كنا اتكلمنا في مقال سابق بعنوان كيف تضيف تطبيقات إلى صفحتك على الفيس بوك عن طريقة اضافة التطبيقات وذكرنا بعض الأمثلة للتطبيقات المفيدة .

الغرض كان فقط ضرب امثلة لبعض التطبيقات وانت ممكن تبحث بالطريقة التي ذكرناها عن تطبيقات أخرى لكن بناء على طلب احد القراء باضافة تطبيقات أكثر بحثت عن بعض التطبيقات اللى ممكن تكون مفيدة لصفحتك … والغرض الأساسي من التطبيقات بيكون زيادة تفاعل الأعضاء مع الصفحة وجعلها صفحة مميزة الى جانب تسهيل بعض الأمور عن طريق انجازها بتطبيق… هذه بعض الأمثلة

Ecwid Shopping Cart

دة تطبيق مفيد جدا لأى حد بيستعمل الفيس بوك لعرض منتجاته للبيع .. التطبيق دة بيخليك تضيف صفحة عندك فيها سلة تسوق والناس تقدر تطلب من خلالها مباشرة والطلب بيجيلك على الإيميل … دة طبعا هيسهل عليك كتير في عملية تلقي الطلبات خصوصا لو مش عندك موقع مخصوص .. و الأجمل من كدة انه مجاني يعني يبقى عندك متجر الكتروني ببلاش!

Gift Creator

دة بيخليك انت نفسك تعمل تطبيق يتيح للناس انهم يرسلوا هدايا مجانية لبعض وبتضيف التطبيق دة بعد كدة على صفحتك. ممكن تستغل التطبيق دة في انك تعمل هدايا حلوة مش موجودة على الفيس بوك او هدايا تكون ليها علاقة بشغلك .. يعني انا مثلا عملت تطبيق يخلي الناس تبعت هدايا لأصحابها عبارة عن تي شيرتات بتعبر عن اللى جواهم و سميته Ooshi T-shirt Gifts

فالناس لما بتدخل الصفحة بتلاقي انها ممكن ترسل هدايا مجانية لأصحابهم فاكيد حاجة مسلية الى جانب ان دة بيعمل دعاية لشركتي و صفحتي

Youtube for pages

لو عندك قناة على يوتيوب وعايز تضع فيديوهاتك اللى عليها على صفحتك دون الحاجة الى رفع كل فيديو مرة أخرى على فيس بوك استعمل التطبيق دة

My Top Fans

هذا التطبيق يبين لك أكتر الأعضاء تفاعلا مع صفحتك عن طريق حساب عدد مرات التعليق والاعجاب والمشاركات مع الأصدقاء… ما فائدته؟ ممكن كل فترة تعمل جائزة لأكتر المتفاعلين على صفحتك فتشجع الناس على التفاعل والمشاركة ودي اكنر حاجة بتعمل انتشار لصفحتك على الفيس بوك

Networked Blogs

لربط مدونتك بالفيس بوك وارسال تحديثات بكل مقال جديد

Fan Appz

دة تطبيق شامل يحتوي على حاجات كتير مفيدة لمديري الصفحات .. يعني مثلا ممكن من خلاله تعمل تصويت Poll او أسئلة Quizz او استفتاء على اكتر 5 حاجات عاجبة الناس في موضوع معين او في منتجات معينة Top5s … الى جانب حاجات تانية في النسخة المدفوعة

Twitter for Pages

لو عندك حساب على موقع تويتر وعايز التحديثات اللى بتكتبها تظهر على صفحتك ممكن تستخدم التطبيق دة

My Linkedin Profile

دة بيخليك تضيف السيرة الذاتية بتاعتك الموجودة على موقع Linkedin الى صفحتك

وبالمناسبة احب اضيف ان الموقع دة مهم جدا لأى حد بيبحث عن وظيفة فلو انت بتبحث عن عمل يفضل انك تعمل حساب عليه وترفع سيرتك الذاتية وتشترك في الاجابة على الاسئلة التي تطرح حتى تبين مهارتك وتمكنك ولو عندك صفحة على فيس بوك اربط الصفحة دي بحسابك بالتطبيق دة

 

طريقة اضافة هذه التطبيقات شرحناها في المقال السابق من هنا

وان شاء الله لو لقيت تطبيقات جديدة سأضيفها هنا الى هذا المقال

الأوسمة: , , , ,

أفضل طريقة للدفع في الشرق الأوسط

11 July, 2010 | 8 تعليقات | مصنف في تجارة إلكترونية

الدفع عند الاستلام طبعا

لأ.. غلط

الطريقة دي احنا عايزين ننسفها اصلا .. ماحدش بقى بيستعملها في التجارة الالكترونية غيرنا للاسف الشديد… ولو فضلنا نستعملها يبقى عمرنا ما هنستعمل الدفع الالكتروني اللى هو من اساسيات التجارة الالكترونية

مش عارفة ليه محسسيني اننا متخلفين او اقل من غيرنا ولازم يكون لينا طرق دفع مخصوصة .. زى ما يكون معانا شهادة مكتوب عليها :”يعامل معاملة الأطفال،ما تخلوهوش يدفع على النت”!

للأسف الطريقة دي لو فضلنا ماشيين عليها ممكن نقضي على التجارة الالكترونية خالص… ازاى؟

هقول مثال بسيط: في ناس بتطلب مني تي شيرتات عن طريق سوق وبعد فترة لقيت شوية تي شحنات رجعت لى تاني بدون حتى ما تتفتح وما اتسلمتش فلما سألت ايه السبب قالولي واحد رجع في كلامه والتاني قال ماعوش فلوس! والتالت مش بيرد على موبايله وهكذا

خدوا بالكم بقى في كام واحد اتضر بسبب ان الناس دي بتهزر

  • انا اخدت الموضوع جد وطبعت التيشيرتات ودة كلفني وقت ومجهود وفلوس
  • أرامكس اخدت الموضوع جد وجت خدت مني الشحنة عشان توصلها ودة كلفهم وقت ومجهود وفلوس
  • سوق اخد الموضوع جد وكلم العميل اكد عليه قبل ما الطلب يطبع وبعدين لما الطلب ما اتوصلش سوق هو اللى اتحمل مصاريف الشحنة اللى اتاخدت من عندي ورجعت لى تاني .. ودة طبعا كلفهم وقت ومجهود وفلوس

كل اللى حصل دة بسبب الدفع عند الاستلام … لو واحد دفع ثمن السلعة على النت مقدما هيرد على تليفونه وهيقعد يستنى شركة الشحن عشان يستلم شحنته لأنها لو رجعتلى هو اللى هيتحمل مصاريف شحنها مرة اخرى

واحدة قريبتي كانت بتجيب حاجات من برة للناس وتخليهم يدفعوا بعد ما يستلموا لكن بردو للأسف في ناس كانت بعد ما هى تشتري الحاجة وتشحنها من امريكا وتدفع جماركها كانوا يقولولها لأ مش عايزين! وكانت بتضطر تعرض الحاجت دي للبيع وهى وحظها بقى

لو المواقف دي فضلت تتكرر للأسف في ناس كتير ممكن تبطل تشتغل من على الانترنت لأن الموضوع هيكون خسارته اكتر من ربحه

طب ايه الحل؟

الحل اننا نكون زينا زى كل البلاد التانية اللى بطلت تستعمل الطريقة دي… كتير جدا بلاقى مواضيع بعنوان:”أفضل طرق الدفع في العالم العربي”  ومناقشات عن ايه الطرق البديلة للدفع الالكتروني.. بصراحة بزعل جدا وبحس اننا للدرجة دي متأخرين لدرجة اننا عايزين نخترع لنا طرق مخصوصة؟

افضل طرق للدفع على النت في العالم العربي هى نفس طرق الدفع في العالم كله.. احنا مش ناقصين ايد ولا رجل

ولو موقع زى Paypal مش عايز يضيفنا احنا المفروض يكون عندنا القدرة اننا نعمل خدمة مماثلة ليه تساعد التجارة الالكترونية في العالم العربي بدل ما تموت قبل ما تبدأ . واصلا في مواقع غيره بتقبل الدول العربية زى Moneybookers مثلا .

هناك طريقة أخرى وهى الدفع عن طريق شبكات المحمول ودي انا لقيت مواقع بتقدمها لكن للأسف العمولة كانت عالية جدا يعني تصل الى 35%  ودة طبعا كتير جدا .. فلو شركات المحمول تعاونت في الموضوع دة ووفرت طريقة للدفع عبر كل الشبكات بعمولة معقولة دة هيكون حل هايل جدا وهيفتح سوق جديدة للشبكات دي

بعض المعوقات التي تقابل الناس في الدفع الالكتروني:

  • انا مش عندي حساب في البنك ازاى هدفع على النت

كنت كتبت مقال قبل كدة عن كروت الفيزا مسبقة الدفع مش بتحتاج يكون ليك حساب.. دي عاملة زى كروت شحن الموبايل كدة بتشحنها وتصرف اللى فيها ومش هيكون عليك اى ديون للبنوك.. انا شخصيا عندي اتنين وبشتري بيهم من امريكا وحتى مرة موقع كان ما بيقبلش كروت من خارج امريكا بردو قلت اجرب حظي ودفعت بيها ونفع 🙂  واشتريت من عليه بس حطيت العنوان بتاع صندوقي في ارامكس في امريكا بدل عنواني في مصر … مشي حالك يعني

  • انا خايف استعمل الكارت يتسرق رقمه

الكارت المسبق الدفع مش بينفع حد يشتري بأكتر من الفلوس اللى موجودة عليه فأفضل شيء انك تتركه فاضي طوال الوقت فحتى لو اتسرق رقمه مش هيلاقوا حاجة يسرقوها ولما تحب تشتري حاجة تشحنه وتستعمله علطول ويفضل انك ما تشتريش من مواقع غير موثوق فيها

  • انا مش واثق في البائعين على النت

الموضوع دة مهم جدا ودة اكبر دليل على اننا لو استعملنا طرق الدفع الالكترونية دة هيساهم في الرقى بالتجارة الالكتروينة لأن كل بائع هيكون عايز يبني ثقة بينه وبين المستهلكين والبائع اللى مش هيكون معروف بامانته محدش هيشتري منه .. فكل واحد هيقدم احسن خدمة عشان يجذب الناس لمتجره

لكن اذا كنت غير واثق في البائع يمكنك الشراء عن طريق موقع مثل Souq.com وهو بيكون وسيط بينك وبين البائع مقابل عمولة من البائع فقط ومش بيخلي البائع ياخد الفلوس الا بعد استلامك للسلعة

اتمنى ييجي اليوم اللى نبقى فيه زى الدول الأخرى ومش اقل منهم وتكون التجارة الالكترونية جزء اساسي من تعاملاتنا التجارية ويكون المستهلك العربي على درجة كبيرة من الوعى والجدية اللى تخليه لا “يعامل معاملة الأطفال”. والكلام دة مش معناه ان نسبة الناس اللى بتهزر ومش واخدة الموضوع جد عالية .. لا والله ابدا النسبة الأغلب محترمين جدا وجادين في معاملاتهم لكن لاحظ اننا لازلنا في البداية ومع ازدياد حجم التجارة هيزداد عدد المواقف اللى زى دي فلو تاجر صغير هيتحمل كل يوم مصاريف شحنة واحدة مثلا على الأقل دة معناه خسارة 600 جنيه في الشهر

الأوسمة: , , , ,

جحا شال حماره

02 July, 2010 | 2 تعليقات | مصنف في تجارة إلكترونية

فاكرين القصة اللى اخدناها زماااااااااان بتاعت جحا وابنه والحمار؟

لما كان جحا وابنه راكبين على الحمار قام الناس قعدوا يبصوله شزرا ويقولوا شوفوا الراجل اللى ما عندوش رفق بالحيوان راكب هو وابنه على الحمار؟؟؟

راح جحا نازل من الحمار وساب ابنه راكب

راحوا قايلين شوفوا الواد قليل الادب ماعندوش دم سايب ابوه يمشي على رجله وهو راكب

راح جحا راكب الحمار ونزل ابنه

راحوا قايلين شايفين الراجل اللى ما عندوش قلب سايب ابنه ماشي على رجله؟

راحوا الاتنين نازلين ومشيوا جنب الحمار!!

طبعا الناس راحت قايلة شايفين الراجل اللى ما عندوش (لاحظ انه دايما “ما عندوش” حاجة معينه) مخ دة .. امال هو اشترى حمار ليه .. طب ما لو مش عايز يركب هو يركب ابنه على الاقل!!

في النهاية جحا عمل حاجة غريبة اوي : شال حماره!!

فقال الناس: جحا اشترى الحمار ليكون له حمارا

طلعوا الراجل في الآخر حمار .. كل دة عشان هو حاول يرضي كل الناس!!

بصراحة هو يستاهل .. مافيش حد على وجه الأرض هيقدر يرضي الناس كلها ولازم في النهاية هيحس بالحمورية!

الاسبوع اللى فات كنت برد على سؤال بخصوص تعديل عمله الفيس بوك يسمح للادمن في الصفحة انه يشيل صاحب الصفحة الاصلي .. ودة في نظري تعديل غبي بصراحة وفي ناس كتير اعترضت عليه بس فيس بوك لجأ ليه لأن ناس تانية كتير بردو طلبته لأنهم بيكونوا طلبوا من واحد يعملهم صفحة ودلوقتي عايزين يكون ليهم السيطرة الكاملة على صفحتهم فعايزين يشيلوا منشيء الصفحة .. ودي وجهة نظر بردو .. بس الشاهد من الموضوع انهم عمرهم ما هيقدروا يرضوا الناس كلها وخاصة انهم بيتعاملوا مع اكتر من 500 مليون مشترك

أنت كمان لما تيجي تعمل مشروع او لو عندك مشروع متصابش بالاحباط لو حد اعترض او انتقد حاجة في مشروعك لأن دة طبيعي .. الناس مش كلها زى بعض ولما هتعمل حاجة تعجب ناس اكيد مش هتعجب ناس تانية … لازم تحط دة في دماغك عشان ما تحسش بالفشل … مادام الاغلبية عجباهم فكرتك او شغلك يبقى خلاص كمل في طريقك .. لكن لو لقيت اغلب الناس مش عاجبها يبقى ساعتها ابدأ فكر في ايه اللى عايز يتغير واسأل الناس عشان تحسن من شغلك

لكن لو كل واحد هيعترض على حاجة هتغير المنتج كله عشانها هتلاقي تاني يوم الناس اللى كان عاجبها المنتج هيقولولك : تؤ احنا كان عاجبنا الأولاني لو سمحت!

الأوسمة: , , ,