| اشترك عبر RSS

سبع طرق لشراء البضاعة لمتجرك

26 April, 2010 | 11 تعليقات | مصنف في تجارة إلكترونية

هذا المقال ضمن سلسلة مقالات التجارة الإلكترونية والتي كنا قد ناقشنا فيها فوائد وعيوب التجارة الإلكترونية وطرق الشغل على الإنترنت ثم انتقلنا للحديث عن المتجر الإلكتروني كأحد اشهر وسائل الشغل على الإنترنت

لما تيجي تفتح المتجر الإلكتروني هتعمل موقع على الإنترنت عشان تبيع من خلاله بضاعتك وتعرضها للناس . اليوم سنتحدث عن طرق مختلفة لشراء البضاعة مع الأخذ في الإعتبار ان مشروعك صغير وربما لا تملك الميزانية الكبيرة مثل المشروعات الكبيرة

طبعا الأمر بيعتمد على نوعية البضاعة التي تريد ان تعمل فيها (جديدة ،مستعملة) وعلى الميزانية ولكن سنتكلم بشكل عام

  • المصنع

دة أول خيار تضعه أمامك وتحاول اللجوء إليه لأنه طبعا بيكون أرخص سعر لكن المعروف ان الشراء من المصنع له عيوبه فأنت ستأخذ السعر الأرخص ولكن في الوقت نفسه ستأخذ كمية أكبر لبضاعة ربما لا تلقى رواجا في متجرك كما ان ذلك سيمنعك من التنوع في البضاعة لأنك ستضطر الى شراء كميات كبيرة من نفس النوع عشان تاخدها بسعر المصنع بينما كان ممكن تشتري كميات أقل من نوعيات مختلفة فيكون عندك أنواع كثيرة ومختلفة تعرضها على الزبائن لكن انت بتحدد خياراتك وبعدين بتشوف اى طريقة افضل لتجارتك

الآن اصبح من السهل الوصول الى اصحاب المصانع مباشرة عن طريق الانترنت عن طريق موقع مثل علي بابا

بتدخل وتكتب في البحث نوع البضاعة التي تريد شرائها وهتلاقي مصانع وتجار من جميع انحاء العالم ويمكنك مقارنة الأسعار ومعرفة الحد الأدنى للكميات المطلوبة وهكذا. حاول دائما ان تبحث عن مصنع في بلدك أولا لتجنب الاستيراد. كما يمكنك على نفس الموفع ان ترسل طلبا لشراء سلعة معينة  ويأتيك عروضا من المصانع فتختار منها

  • تجار الجملة

لو كنت مش هتقدر على كميات المصنع ممكن تلجأ للخيار التالي وهو تاجر الجملة اللى هو اصلا بيشتري من المصنع فطبعا هيبيعلك بسعر اعلى من سعر المصنع بس هيكون سعر الجملة وانت هتبيع قطاعي فهتكسب بردو ان شاء الله وممكن يكون دة احسنلك كما ذكرنا من قبل

  • تسييل (liquidation)

دي لو عرفت تلاقيها في مجال بضاعتك هتبقى فرصة حلوة جدا. بعض التجار بيكون محتاج سيولة وعنده بضاعة كثيرة جدا فبيعرضها بسعر رخيص جدا وربما يكون سعر المصنع أو أقل وبكميات اقل فبتكون فرصة لأى واحد عنده مشروع صغير

  • إستيراد

أحيانا بتكون البضاعة اللى انت عايز تشتغل فيها مش موجودة في بلدك ففي الحالة دي لازم تحدد الأول جدوى الموضوع قبل ما تستورد لأن الاستيراد يعني شحن وجمارك وبطاقة استيرادية فخلى بالك انك تجيب الحاجة اللى بعد ما تشحنها وتضيف عليها الجمارك والربح بتاعك تتباع بسعر منافس في السوق ودة غالبا بيمشي في السلع اللى مافيش معروض منها او مفيش حد غيرك بيجيبها والطلب عليها كويس. بعض الناس بتطلب مثلا ملابس ماركات عالمية ملهاش توكيل في مصر وتكون الناس بتحبها ودي ممكن تجيب منها كميات قليلة لأنك هتطلبها من على الانترنت بالقطعة وبعد كدة تضيف عليها ربحك. الطريقة دي ممكن تكون مفيدة لحد مش عايز يجيب بضاعة بكميات كبيرة

في ناس تانية بتسافر تجيب مثلا بضاعة من الصين بس السفرية دي اولا محتاجة مصاريف كتير وثانيا لازم تجيب كميات كبيرة عشان يكون ليها جدوى وتاخد اسعار كويسة

  • أصحاب المهارات الفنية

في ناس بتعمل شغل يدوي جميل جدا مثلا تحف او مصوغات او حاجات للديكور وبيكون شغلهم مميز ومش موجود في كل حتة . ممكن تتفق مع واحد او اتنين منهم انك تسوق لهم الحاجت اللى هيشتغلوها او تشتري منهم بسعر الجملة وتبيع على الانترنت

  • بواقي المصنع

لما بدأت الشغل بتاعي كان ساعات بيعرض عليا حاجات بواقي مصنع وماركات عالمية زى مثلا Gap,Banana Republic وطبعا كنت برفضها لأني مش عايزة ابيع حاجات فيها عيوب بس فهمت بعد كدة ان انا كنت فاهمة غلط وغالبا ناس كتير هتكون فاهمة غلط زيي لأن بواقي المصنع بتبقى نوعين. نوع بيكون الحاجات اللى طلع فيها عيوب ونوع تاني بواقي الكميات الزائدة عن حاجة المصنع. يعني مثلا المصنع محتاج 20000 قطعة فبيصنع 22000 عشان ممكن حاجات يكون فيها عيوب بيطلع مثلا 500 فيهم عيوب و1500 زيادة عن حاجته بس من غير عيوب. انا عن نفسي ما جربتش اشتري منهم لأني كنت عايزة تي شيرتات خاصة بيا وعليها الماركة بتاعتي لكن ممكن لو انت عايز تبيع ماركات مشهورة تشتري من بواقي المصنع اللى من النوع التاني اللى من غير عيوب وبيكون اسعارها رخيصة جدا لكن طبعا لازم تعاين البضاعة كويس قبل ما تشتريها ويفضل انك تفهم زباينك ان دي بواقي مصنع لأنك أصلا هتبيعهم بسرع ارخص من العادي فلازم تفهمهم ليه سعرك رخيص عشان يكون فيه مصداقية وعشان هما ما يفتكروش ان بضاعتك معيوبة. بس الطريقة دي بردو بتتطلب انك تاخد كميات كبيرة

سمعت من أحد التجار ان الناس دلوقتي بقت عايزة الحاجات الرخيصة لدرجة ان بعض المحلات اللى كانت بتجيب ماركات من برة وبتبيعها بسعر غالي بدأت تصفي نشاطها وتغلق لأن الاقبال بقى على الحاجات الأرخص وأكبر دليل على كدة الموبايلات الصيني المنتشرة في مصر لدرجة خلت جهاز تنظيم الاتصالات يقطع عنها الخدمة ومع ان نفس ماركة الموبايل الاصلي ليها وكيل في مصر بس في ناس كتير بتفضل الصيني عشان سعره وان كنت انا شخصيا بكره اى حاجة صيني لأني بحس انك هتدفع في النهاية قد اللى كنت هتدفعه في الحاجة الاصلية لأن الصيني هيبوظ وهتصلحه ويبوظ وتصلحه ويبوظ وترميه وتشتري غيره صيني بردو ويبوظ وتصلحه … الخ

  • المستعمل

أهو المستعمل دة له سوق لوحده وليه الناس اللى بتشتريه بردو عشان سعره بيكون رخيص بس طبعا اهم حاجة لو هتبيع على الانترنت انك تفهم الناس طبيعة البضاعة انها مستعملة و توصف حالتها بدقة ويكون فيه مصداقية عشان تقدر تكمل المشروع. النوع دة منتشر حتى في أمريكا على e-bay مثلا هتلاقي حاجات كتير بتباع مستعملة ودة مش عيب بس هيكون عليك مجهود كبير اوي عشان تقدر تشتري حاجة وتتأكد ان ما فيهاش عيوب كبيرة لأن لو طلع فيها عيوب فدة هيضر اسمك انت قبل اى حد تاني. طبعا الطريقة اللى هتجيب بيها البضاعة المستعملة بتكون سهلة بس انصحك بحاجة حلوة سمعت عن ناس بتعملها ، بيكون في اجانب مثلا جايين يقعدوا في مصر سنة او سنتين فبيشتروا احتياجاتهم المعيشية من الاجهزة زى مثلا تكيفات ،ثلاجات، غسالات، تليفزيونات وأثاث وبعدين قبل ما يسافروا بيحاولوا يبيعوا الحاجت دي وبيكون استعمالها خفيف جدا (سنة او اثنين) – استعمال طبيب يعني 🙂 – وحالتها جيدة وسعرها رخيص جدا لأنهم بيكونوا خلاص مسافرين قريبا فدي بتكون فرصة لأى تاجر عايز يشتغل في المستعمل

دي بعض الأفكار لطرق مختلفة ممكن تجيب بيها البضاعة وزى ما قلنا بتختلف على حسب السلعة والميزانية ويا رب تكون مقالة مفيدة

وفُتكم بعافية

الأوسمة: , , ,

ما الفرق بين الجروب و صفحة المعجبين على الفيس بوك؟

07 April, 2010 | 164 تعليقات | مصنف في شبكات إجتماعية

لا شك ان الشبكات الاجتماعية مثل فيس بوك وتويتر لها اهمية خاصة للشركات لاستخدامها كأداة للتفاعل مع المستهلكين ومعرفة آرائهم في المنتجات وكذلك للتسويق من خلالها والوصول الى شريحة كبيرة جدا من الناس

عندما تؤسس مشروعا وتريد ان تتواجد على الفيس بوك دائما ما يواجهك هذا السؤال: ايهما افضل جروب على الفيس بوك ام صفحة المعجبين؟

facebook group or facebook fan page

في الماضي كان كل الناس تستعمل الجروب ثم انشأ فيس بوك طريقة أخرى تناسب الاعمال والمشاريع وهى الصفحات التي صنعت خصيصا لهذا الغرض. ولكن مع ظهورها اصبح هناك جدلا بين ايهما افضل وذلك لاختلاف المزايا بين الاثنين وفيما يلي سنستعرض بعض الاختلافات مع تعليق شخصي على معظم النقاط

  • مراسلة الأعضاء

في حين ان اصحاب الجروبات كانوا معتادين على مراسلة الاعضاء عن طريق ارسال رسائل جماعية على البريد الخاص الا ان صفحات المعجبين لا توفر هذه الخاصية وانما يمكن لاصحاب الصفحات ان يرسلوا ما يعرف ب”نحديثات” الى جميع الاعضاء ولكنها لا تظهر في بريدهم الخاص وانما تظهر تحت كلمة الرسائل مما يجعل معظم الناس لا يلتفت اليها ومعظمهم لا يعرف بوجودها اصلا وهذا يعتبره البعض عيب في الصفحات وميزة في الجروبات

انا شخصيا افضل ان تكون التحديثات منفصلة عن بريدي الخاص لاني عندما احب شركة معينة انضم لصفحتها ولكن هذا ليس معناه انني على استعداد لاستقبال رسائل بريدية من كل الصفحات كل يوم مما يزحم بريدي الخاص .فأنا عندما انضم الى جروب ثم اجده يرسل الى رسائل كثيرة على البريد اترك هذا الجروب فورا.فما يراه البعض عيبا انا شخصيا اراه ميزة لان هذا يعني ان المهتم بعروضي يمكنه الاضطلاع عليها من خلال التحديثات التي استخدمها قليلا جدا لارسال اكواد وخصومات للاعضاء او اى عروض حصرية للاعضاء فقط اما غير ذلك فيتم نشره على الحائط ليراه كل من يزور الصفحة حتى وان لم يكن عضوا في الفيس بوك كما يراه الاعضاء ايضا في صفحتهم الرئيسية دون الحاجة الى زيارة صفحتى ودون الحاجة الى انتهاك خصوصية الاعضاء واقتحام بريدهم الالكتروني

  • الحائط

لا يوجد هناك تفرقة في حائط الجروب بين ما يكتبه الاعضاء وما يكتبه أصحاب الجروب ولذلك اذا كتبت شيئا ليراه كل من يدخل الجروب فسرعان ما سيزول بكتابة اعضاء كثيرين بعدك وسينتقل الى الاسفل . وهذا الامر تم الاعتناء به في الصفحات ولذلك تجد هناك حائطين واحد للاعضاء وواحد لاصحاب الصفحة ويكون لك الاختيار في ايهما يراه الزائر عندما يدخل صفحتك لأول وهلة وبهذا تضمن انك لو كتبت عرضا جديدا مثلا تريد ان يراه الزوار بمجرد دخولهم الصفحة فسوف يكون ذلك متاحا لك بعكس الجروب

  • الرسائل الموجهة

يمكن من خلال الصفحات ان توجه رسالتك الى مجموعة بعينها على عكس الجروب

فمثلا لو اردت ان ترسل عرضا للاعضاء الموجودين بالسعودية فليس هناك حاجة الى ان يظهر هذا العرض على الصفحات الرئيسية لباقي الاعضاء في دول اخرى وانما يمكنك تحديد البلد قبل نشر التحديث

  • خصوصيتك انت

من أفضل خصائص الصفحات هى انك كمدير للصفحة عندما تكتب اى شىء لا يظهر اسمك وانما تكتب باسم الصفحة نفسها وهذا ينطبق ايضا على من تعينهم مديرين لصفحتك. لا شك ان هذا يضفي حرفية اكثر على صفحتك كما انه يحافظ على خصوصيتك. مش لازم كل الاعضاء يشوفوا بروفايلك الخاص وصورك واصدقاءك وعائلتك. في رأيي الشخصي كدة افضل

  • التطبيقات Applications

لا يمكنك اضافة تطبيق مثل تطبيق التصويت مثلا الى جروب بينما يمكنك اضافة اى تطبيق الى الصفحة فيراه كل من يدخل اليها فمثلا انا استخدم عدة تطبيقات في صفحتي منها التصويت وتطبيق آخر يتيح لي نقل خلاصات المدونة الى الصفحة في صندوق مخصص وتطبيق يجعل الزوار يرسلون هدايا مجانية عبارة عن تي شيرتات لأصدقائهم على الفيس بوك وتطبيق يجعلني اصمم صفحة خاصة لاستقبال الزوار الجدد بحيث كل من يدخل الصفحة دون ان يكون مشتركا يرى صورة خاصة توضح باختصار نوعية منتجاتي. هذه التطبيفات تجعل زيارة صفحتك تجربة ممتعة

  • البومات الصور

مفيش شك ان الصور جزء مهم جدا في اى صفحة على الفيس بوك خاصة لو الصفحة متعلقة بمشروع تجاري وبيع منتجات. الناس دايما بتحب الصور.وفي حين ان الجروب لا يعطيك امكانية تقسيم صورك الى البومات او ترتيبها او اختيار صور تكون واجهة للالبوم فهذه الامكانية موجودة في الصفحات، وفي رأيي هذه ميزة مهمة جدا تمكنك من تقسيم الصور حسب المنتجات او حسب الموديلات وهى تسهل على الاعضاء المشاهدة، كما انك ممكن بسهولة لو عايز حد يتقرج على صور منتج معين ان تعطيه لينك للالبوم الخاص بهذا المنتج بدلا من ان يتوه بين الصور الكثيرة

  • الإحصائيات

تعطيك الصفحة امكانية معرفة احصائيات دقيقة عن تفاعل الاعضاء مع صفحتك مثل عدد الاعضاء ونسبة الزيادة وعدد المشاركات وعدد زوار الصفحة كما يرسل اليك فيس بوك كل اسبوع تقريرا عن صفحتك في اهم هذه الاشياء مما يمكنك من تحسين الخدمة .هذه الخاصية غير متوفرة في الجروب

  • صندوق المعجبين   Fanbox

كالموجود هنا في المدونة او على موقعي

يمكنك اضافته في موقعك او مدونتك ويمكن للناس الانضمام مباشرة الى صفحتك وهذا ايضا غير متوفر في الجروب

  • خصوصية الجروب

اذا اردت ان تكون الصفحة خاصة بك وببعض الاصدقاء فقط او ان يقتصر الانضمام على من تريده انت وتسمح له فقط فعليك اذن ان تؤسس جروب لأن هذه الخاصية غير متوافرة في صفحات المعجبين

هذه هى ابرز الاختلافات بين الاثنين وانت في النهاية تحدد ايهما افضل بالنسبة لشغلك واعتمادا على احتياجاتك

الأوسمة: , , ,

كيف تنشيء موقعك الإلكتروني بنفسك؟

02 April, 2010 | 14 تعليقات | مصنف في تجارة إلكترونية

أذكر أن والدي من سنين فاتت كان عمل موقع الكتروني للتعريف بشركته ولكن هذا تطلب منه ان يلجأ لاحدى الشركات التي تصمم المواقع وطبعا كانت التكلفة عالية دة غير انه لم يكن متحكما في الموقع بالشكل الكامل وانما كل الذي كان يتحكم فيه هو فقط الدخول على البريد الالكتروني للموقع للرد على الرسائل

هذا المقال هو بالأساس موجه لمن يريد انشاء موقع الكتروني بأقل التكاليف وبدون اللجوء الى مصمم مواقع. يعني مش لازم لو عايز تعمل موقع تروح لواحد يعملهولك صفحة واحدة ب900 جنيه في حين انك ممكن تعمل موقع كامل بأى عدد صفحات وفيه سلة تسوق كمان يعني ممكن تبيع من خلاله منتجاتك بــــ… استنوا اما احسب التكلفة بالكالكوليتور

آه  بأقل من 500 جنيه في السنة

أولا: الدومين

وهو عنوان الموقع بتاعك يعني مثلا

www.example.com

دة هتجيبه من عند عم جو دادي

Go Daddy

السعر بيختلف حسب النطاق لكن لو هتختار اشهر نطاق اللى هو

.com

هيكون في حدود 10دولار في السنة يعني  تقريبا 60 جنيه

حاول دايما انك تختار دوت كوم لأنه اسهل واحد في الحفظ ولو ما لقيتهوش متاح اختار دوت نت عشان مهم جدا ان الناس تقدر تحفظ الدومين بتاعك بسهولة.وكمان اسم الدومين نفسه اختاره سهل وقصير الله يكرمك بلاش نظام

www.abcdefghijklmn-opqrstuvwxyz.com

مش لازم كل ما واحد ييجي يقول لاصحابه على الموقع بتاعك عشان يدخلوه يقعد يدور في جيبه عن الورقة اللى مكتوب فيها اسم الموقع من كتر ما الاسم صعب وطويل

بعد ما تشتري الدومين تنتقل للخطوة التالية

ثانيا:الاستضافة

هتروح شركة من شركات الاستضافة زى

Hostgator ,Bluehost,1and1

وتختار النظام اللى يناسبك وهتلاقي الأسعار غالبا في حدود 7 دولار في الشهر ولو هتشترك لأكثر من سنة ممكن السعر يوصل ل5دولار يعني اقل من30 جنيه في الشهر يعني 360 جنيه في السنة

والشركات دي بتديك مساحة غير محدودة في مقابل الشركات المصرية او العربية التي تعطيك مساحة محدودة وبسعر اعلى..معرفش ازاى

طريقة الدفع: طبعا عشان الشركات دي في الخارج فهتدفع عن طريق موقعها على الانترنت بالطريقة التي ذكرناها من قبل وهى كروت الفيزا مسبقة الدفع التي لا تحتاج الى حساب بنكي ومافيهاش فوايد ووجع دماغ

تمام كدة؟ دلوقتي انت بقى عندك اسم الموقع ومكان للاستضافة … فاضل ايه؟

محتوى الموقع نفسه … المقالات والصور والبضاعة وكدة يعني

ثالثا:نظام لإدارة المحتوى

زى ما قلنا ان الكلام دة موجه للناس اللى ما عندهاش خبرة بلغات البرمجة فأمثل نظام تشتغل بيه هو

joomla

دة عبارة عن برنامج مفتوح المصدر يعني مجاني بتقوم بتنصيبه على السيرفر بتاعك بعد ما تشترك في خدمة الاستضافة وبيخليك تنشر مقالاتك وصورك  واى حاجة عايز تنشرها على الموقع. والأهم من كدة انه بيمكنك انك تفتح سوق او متجر على موقعك عن طريق سلة تسوق

shopping cart

بتعرض فيها منتجاتك والناس ممكن تطلب مباشرة من على الموقع والطلب بيوصلك وممكن كمان يدفعوا عن طريق الانترنت

البرنامج مجاني وسلة التسوق كمان في منها مجاني

والاهم من كدة ان اى حد ممكن يستعمله بسهولة كأنك بالظبط بتكتب في مدونة

بالنسبة للتصميم فجملة له قوالب جاهزة منها المجاني ومنها اللى بتشتريه بس عامة اكيد هتلاقي قالب يناسبك

اكتب في جوجل

free joomla templates

وهتلاقي مواقع كتير اختار منها اللى يعجبك


دي باختصار الخطوات التي تتبع في انشاء موقع الكتروني واللى انا نفسي اتبعتها أظن مافيش اسهل من كدة

ومصممي المواقع ما يزعلوش مني بس انا من انصار

DIY – Do it Yourself

اعملها بنفسك … طبعا عشان ارخص

وفُتكم بعافية



الأوسمة: , ,