| اشترك عبر RSS

هل أنشيء موقعا إلكترونيا أم صفحة على الفيس بوك؟

حينما تبدأ في مشروعك الصغير تحاول بقدر الامكان ان تقلل من نفقاتك فغالبا ما يطرح السؤال : هل فعلا انا بحاجة لموقع الكتروني ام يكفيني فقط ان أنشيء صفحة او جروب على الفيسبوك لتسويق منتجاتي؟

مبدئيا: اى مشروع على الانترنت( وحتى خارج الانترنت) عشان ينجح لابد ان يستفيد من دور الشبكات الاجتماعية في التسويق واهمها طبعا الفيس بوك ولكن نحن نسأل هل يغني الفيس بوك عن الموقع الالكتروني؟

الاجابة تعتمد على مشروعك انت واهدافك

فلو كنت تريد ان تصنع اسما او ماركة فيجب عليك ان تنشيء موقعا الكترونيا لان ذلك يعطي انطباعا عن ان مشروعك مشروع احترافي كما انه يزيد من ثقة المستهلك فيك و سيساعدك في شراء بضاعتك حيث سيعطي ايضا شكلا احترافيا لكل من سوف تتعامل معهم من الموردين او التجار

لو كنت تريد انشاء متجر الكتروني يستطيع الناس القيام بالطلب من خلاله والدفع عن طريق الانترنت فأنت بلا شك تحتاج لانشاء موقع خاص بك

لو كنت لاتزال في مرحلة تجربة المشروع ومعرفة اذا  كان سينجح ام لا ممكن تبدأ بجروب عن فكرة المشروع واذا لاقى استحسانا تنشيء الموقع

ولو كنت تريد فقط ان تشتري منتجات وتبيعها على الانترنت بشكل شخصي او لا يهمك انشاء اسم تجاري لمشروعك فيمكنك ان تكتفي بجروب على الفيسبوك تعرض عليه بضاعتك او تقدم من خلاله خدماتك وان كان انشاء موقع ايضا سيفيدك للاسباب السابق ذكرها

هل إنشاء موقع يتطلب تكلفة عالية؟

اطلاقا. فأنت بامكانك ان تنشيء موقعك بنفسك ببلاش! البعض يظن ان انشاء موقع يتطلب اللجوء الى مصممي المواقع و دفع مبالغ باهظة. أقولك سر؟ انا أنشأت موقعي بنفسي بدون اللجوء الى مصمم مواقع او اى شيء وان شاء الله سأكتب مقال منفرد عن كيفية انشاء موقع الكتروني والخطوات الرئيسية لفعل ذلك بالترتيب

بعض الشركات تقدم لك أيضا خدمة استضافة مواقع مجانية مثل

Google Sites

Wix

طبعا هناك فرق بين الخدمة المجانية والخدمة المدفوعة مثل انك لو دفعت سيكون لك الدومين الخاص بك ومميزات اكتر لكن ما اريده هنا هو ان اوضح ان انشاء المواقع ليس صعبا على الاطلاق وفي كل الحالات اذا أنشأته بنفسك سيكلف اقل بكثير مما اذا لجأت لمصمم او شركة لتصميم موقعك وسنتكلم بالتفصيل في المرة القادمة ان شاء الله عن الخطوات و الاسعار

س:هل أنشيء موقعا إلكترونيا أم صفحة على الفيس بوك؟

ج:الإثنين . الموقع ليكون واجهة لك على الاقل وصفحة على الفيسبوك للتسويق لمنتجاتك وللتفاعل مع المستهلكين ومعرفة آرائهم والمساعدة في انتشار فكرتك. وسنتكلم في مرة قادمة ان شاء الله عن ايهما افضل لمشروعك

facebook group ام facebook fanpage


الأوسمة: , , , ,

عرب نت وفرص التجارة الالكترونية في العالم العربي

21 March, 2010 | 3 تعليقات | مصنف في تجارة إلكترونية

كنا لسة بنتكلم عن المشاريع التجارية على الانترنت والتحديات التي تواجهها هذه المشاريع نظرا لأن المنطقة العربية لازالت في مرحلة البداية وهى دائما اصعب مرحلة ولكنها في الوقت نفسه تكون المرحلة الاكثر ربيحة لمن يستغلها بشكل صحيح … وذلك لأن المشاريع تكون اقل وبالتالي المنافسة اقل

لاشك ان الانترنت منتشر بشكل كبير جدا في العالم العربي

لما حاولت اطلع احصائية بسيطة لعدد مستخدمي موقع الفيس بوك في عدد من الدول العربية كانت النتيجة كالتالي

اكثر من 12 مليون مستخدم في 14 دولة عربية

مصر وحدها فيها ما يقرب من 3 مليون مستخدم

ودة في موقع الفيس بوك فقط

طب ال3 مليون مستخدم دول في كام مشروع تجاري على الانترنت بيقدم لهم خدمات ومنتجات؟

قليل جدا … ممكن يعدوا على الاصابع

هل دة معناه ان العرب مش عايزين يشتغلوا عن طريق الانترنت؟

لما عملنا تصويت هنا في المدونة وكان السؤال:نفسك تعمل مشروع تجاري على الانترنت؟

جاءت الاجابات حتى الآن كالتالي

62% نعم

38% ممكن لو مش هيحتاج رأس مال كبير

0% لأ خالص بقى

0% ما يضرش

يعني 100% من المصوتين عايزين يعملوا مشاريع تجارية على الانترنت

جزء كبير منهم قال انه هيعمل المشروع لو مش هيحتاج رأس مال كبير يعني لو اكبر من امكانياته مش هيقدر يعمله وان كان هو نفسه يعمله وممكن يكون عنده فكرة المشروع لكن يحتاج للتمويل

دة يدخلنا على موضوع انهاردة وهو مؤتمر عرب نت

أول مؤتمر عربي لتطوير صناعة الاعمال على الإنترنت في الشرق الأوسط وشمال أفريقيا

المؤتمر دة فيه حاجة جديدة تحت رعاية جوجل وهى ماراثون الافكار

ideathon

بيدي فرصة للشباب اللى عندهم افكار مشاريع انهم يعرضوا فكرتهم امام الحاضرين وممكن يجدوا من عنده الاستعداد لتمويل هذه الفكرة وممكن يحصلوا على جوائز نقدية

انا متأكدة ان شباب العرب عندهم افكار جامدة جدا واكيد هنشوف حاجات مبتكرة في المؤتمر دة

للأسف عرفت مؤخرا ان كان فيه ورشة عمل في القاهرة بس عرفت بعد ما خلصت لكن هحاول اتابع اعمال المؤتمر على الإنترنت لانه فعلا بداية مبشرة جدا وخاصة انه هيناقش التحديات التي تواجه التجارة الالكترونية في العالم العربي

وبما ان جوجل بتقدم رعاية للمؤتمر دة فأنا اتمنى من القائمين على المؤتمر انهم يطرحوا فكرة ادخال خدمة

Google Checkout

الى العالم العربي سؤاء للمشترين او للبائعين لأن من اكبر التحديات طريقة الدفع على الانترنت وجوجل عندها الحل فليه ما تقدموش؟

الأوسمة: , , , ,

ثمانية أسباب تخلي الناس ما تشتريش منك

13 March, 2010 | 10 تعليقات | مصنف في تجارة إلكترونية

لو سمحت بكام دي؟

انظر الخاص عندك

How much?

Check your inbox

دي بتحصل كتييير جدا على الفيس بوك ويفضلوا الناس تحت كل صورة يكتبوا بكام؟ بكام؟ بكام؟

دة اول سبب يخليني انا شخصيا ماشتريش من متجر الكتروني معين وهو

عدم وضوح سياسة التسعير

ليه ما تكتبش اسعارك مادامت اسعارك موحدة للناس كلها.. انت كدة بتخسر زباين كتير اوي بيفتكروا ان انت ما عندكش مصداقية وانك بتدي السعر على حسب مستوى العميل

واحدة صاحبتي راحت محل اثاث كبير وسألتهم على الأسعار قالوا لها اسعار غالية جدا راحت باعته السواق بتاعها يسأل تاني قالوا له اسعار تانية خالص أقل!!! طبعا دي تنسف مصداقية اى مشروع عند الناس

ممكن افهم ان محل يعمل تخفيضات لزباينه الى اشتروا منه اكتر من مرة لكن اللى مش قادرة افهمه ليه الناس ما تعلنش اسعارها الموحدة امام الجميع؟؟؟

مرة كلمت محل ادوات صحية: لو سمحت السيفون بتاعي باظ وعايزة اشتري واحد جديد ممكن اعرف بكام؟

الاجابة: ما بنقولش اسعار في التليفون

هى الاسعار دي سر نووي؟

المغالاة في الاسعار بشكل غير منطقي


“هو كل من هب ودب هيشتري السلعة بتاعتي ولا ايييييييه؟”

بعض الناس بيكون عايز المنتج بتاعه يقتصر على فئة معينة من الناس هى فقط اللى تشتريه عشان المنتج ما “يبيأش”  أولرغبته في الثراء السريع بين يوم وليلة فبيلجأ لرفع الاسعار بطريقة مبالغ فيها جدا…بس في رأيي المتواضع دة خطأ للأسباب التالية

أولا:ان المنتج بتاعك لسة في بدايته وبالتالي انت مش ماركة معروفه فاى واحد هييجي يشتري منك وتقوله مثلا التيشيرت دي ب250 جنيه علطول هيقارن بينها وبين اى تيشيرت ماركة مشهورة ممكن يجيبها بنفس السعر دة او اقل وغالبا المقارنة هتكون في صالح الشركات الكبيرة اللى عملت اسمها في السوق وخاصة ان الفئة اللى انت عايز تستهدفها دي بالذات بيحبوا يلبسوا ماركات

ثانيا: لازم تعرف ان الفئة اللى انت بتستهدفها دي قليييلة جدا يعني ممكن ما تحققش لك الربح اللى يخليك تستمر في تجارتك دة غيرانها فئة من الصعب جدا ارضائها يعني ممكن في الآخر ما يشتروش منك خالص ويشتروا الماركات زى ما قلتلك

وأخيرا:الحالة الوحيدة اللى ممكن تبرر رفع الاسعار هى انك تكون بتتعب في المنتج دة يعني مثلا بتشتغله بايدك وبياخد منك وقت ومجهود فلازم يكون العائد مرتفع عشان تستمر في الانتاج والا هتتعب وتوقف علطول وكمان عشان لو الاسعار قلت والطلب زاد ممكن ما تلاحقش على الطلبات ويجيلك انهيار عصبي في الآخر

من الآخر:خليك واقعي واحسب السعر على حسب المعطيات بتاعت السوق وبتاعت المنتج بتاعك

عدم وجود حاجة للمنتج بتاعك


“هتودي بطاطين الكونغو يا ابراهيم؟”

سؤال منطقي بردو من يوسف بك وهبي

من بدائيات التسويق هو اننا نعرف حاجة السوق للبضاعة بتاعتنا

ما تنتجش حاجة السوق مش محتاجها وبعدين تحاول تسوق لها عشان تتباع… بالعكس قبل ما تبدأ شغلك ادرس السوق وشوف هل السوق فعلا محتاج البضاعة بتاعتي ولا لأ… لأن لو السوق مش محتاج البضاعة يبقى مش هتتباع او مش هيكون عليها اقبال وفي الحالتين هتخسر

الناس مش فاهمة المنتج بتاعك دة بيعمل ايه اصلا

ما ينفعش تكتب على الموقع بتاعك

احنا وبلا فخر اول من ادخل الفنكوش الى العالم العربي

انهاردة شركة سبيد بتقدملكوا منتج هز الاسواق العالمية : الفنكوووووش

شهادات العملاء

أنا لما اشتريت الفنكوش حياتي اتغيرت وبقيت علطول منفوش

جوزي قالي عليا الطلاق بالتلاتة يا ولية لانتي شارية الفنكوش

حضرتك انا لما جبت الفنكوش حضرتك بقيت حضرتك حاسس اني كدة كأني بقيت حاصل على شهادة الأيزو

ماشي … ايه هو الفنكوش بقى؟ ما عرفناش في الآخر دة عبارة عن ايه حضرتك

ما تفترضش ان الناس كلها عارفة ايه هو الفنكوش

اشرح لهم ما هو الفنكوش؟ ماهى مكونات الفنكوش؟والاهم من كدة ليه خلى الراجل منفوش؟

احساس الناس بعدم الثقة


دة سبب مهم اوي وخصوصا انك بتبيع عن طريق الانترنت يعني الناس مش شايفة البضاعة وتقدر تعاينها

لازم تديهم احساس بالامان ما ينفعش مثلا تكتب

البضاعة المباعة لا ترد ولا تستبدل

بغض النظر عن ان الجملة دي غير قانونية وتخالف قانون حماية المستهلك لكن بردو الجملة بتدي احساس كبير بعدم الامان … طب افرض البضاعة طلعت بايظة؟

في متجر الكتروني اشتريت منه اكتر من مرة وعجبني اوي وعشان انا دايما بحب اشجع الحاجات دي بدأت اقول للناس عليه عشان يجربوه… وفي مرة اختي كانت عايزة تشتري طابعة (برينتر يعني) فقلت لها ما نطلبها دلوقتي من على النت وهتجيلك لحد البيت وفعلا عملتلها الطلب .. تاني يوم كلموها وقالوا لها اللى انتي طلبتيها مافيش منها غير واحدة بس في المخزن ودي آخر واحدة بس الكرتونة بتاعتها مخرومة

أختي ماكانش عندها مشكلة انها تشتري حاجة الكرتونة بتاعتها مخرومة مادام الجهاز نفسه سليم بس اللى خلاها ما تشتريش ان الست قالت لها لو اشتريتيها وحبيتي ترجعيها هيبقى فيه غرامة!! انا مش قادرة افهم ازاى ادفع غرامة لو الجهاز طلع بايظ؟

طبعا القرار في الحالة دي كان : طيب خلاص انا هنزل اشتريها بنفسي من اى محل عشان اعاينها بنفسي وحتى لو طلعت بايظة فهيبقى عليها ضمان مش عليها غرامة

وهما كدة خسروها كزبونة وخسروني انا كمان وخسروا كل الناس الى كانوا ممكن ييجوا عن طريقنا .. اتمنى ان دي تكون غلطة موظف مش سياسة الموقع دة لاني فعلا بحبهم

الزننننننننننننننن


بعض المواقع الاجنبية اللى دخلتها بيكون عندها قدرة على الزن غير عادية

كل سطرين تقولك اشتري الآن اشتري الآن اشتري الآن لاااازم تشرب ايمانا منهم بأن الزن على الودان امر من السحر

لازم هما يعرفوا ان المستهلك مش حمار

المستهلك مش هيدفع فلوس في حاجة هو مش مقتنع بيها او مش محتاجها ولما بيلاقيك عمال تزنننننننن عليه بيهرب بسرعة من كتر زنك ولانه حس ان الزن دة اكيد وراه نصب

الناس مش عارفين يوصلولك


ممكن تكون السلعة بتاعتك هايلة والسوق محتاجها لكن لأنك ما اعلنتش عنها بالشكل الكافي وما عملتش واجب التسويق بتاعك فالناس اصلا ما سمعتش عن سلعتك

ما تراهنش على الناس اللى اشتروا منك انهم هيروحوا يقولوا لأصحابهم عليك لأن بكل بساطة ممكن ينسوا

لازم انت كمان بدورك تعمل تسويق للمنتج بتاعك بأكثر من وسيلة وتحاول توصل كلمتك للناس على قد امكانياتك وميزانيتك طبعا وان شاء الله هنتكلم عن الوسائل المتعددة للتسويق في مرة قادمة وهنحاول نلاقي طرق للتسويق باسعار رخيصة .. يعني مش لازم تروح لشركة دعاية واعلان عشان يعملولك اعلان ويطلع في التليفزيون

خدمة العملاء سيئة


من كام يوم كنت بكلم شركة شحن

لو سمحت عايزة اعرف لو عايزة ابعت شحنة وزنها اقل من كيلو داخل القاهرة تبقى بكام؟

يبقى ب16 جنيه ونص

طب لو عايزاكوا تحصلولي ثمن المنتج من العميل هيبقى السعر كام؟

لأ ما بنحصلش فلوس

يعني ايه مش بتحصلوا فلوس؟      (ملحوظة: انا ما سألتش السؤال دة لأني غبية او ما بعرفش عربي.. انا سألت السؤال دة لسبب واحد بس وهو انهم كاتبين على الموقع بتاعهم ان عندهم خدمة الدفع عند الاستلام يعني انا بسأل عن حاجة هما بيقولوا انها موجودة عندهم) دة غير اني كان جايلي شحنة عن طريقهم تاني يوم وعليها تحصيل فلوس مني

يعني.. ما بنحصلش.. فلوس ..وقالها بطريقة وصوت يحسسك اللى هو يعني انتي ما سمعتيش؟ او ما بتفهميش؟

قلت له بس انا جايالي شحنة عن طريقكوا بكرة وعليها تحصيل فلوس ازاى مش بتحصلوا فلوس؟

قال لى دي بتبقى حاجة تانية وبيكون اتفاق مع الشركة

آه يعني افتح حسا..؟

اى حاجة تانية اقدر اساعدك فيها؟

ما ردش على سؤالي لانه اصلا ما اهتمش انه يسمعني للآخر

قلت له لأ وقفلت السكة وقلت في نفسي مش عايزة اتعامل معاكوا اصلا .

طبعا دي لو كانت خدمة عملاء كويسة كان المفروض يسألني هو حضرتك عايزة تفتحي حساب معانا؟ ويفهم مني اذا كنت انا واحدة عادية عايزة تبعت شحنة عادية ولا انا بشتغل وعايزة افتح حساب واتعاون معاهم

نصيحة: اختار موظفي خدمة العملاء بعناية شديدة لانهم واجهة الشركة

ودي كانت بعض الاسباب اللى تخلي الناس ما تشتريش منك


انا مش هبعت المقالات تاني على الفيس بوك لأن مالهاش علاقة اوى بموضوع ال

Fanpage

فلو عايز تتابع المقالات دي ابقى زور المدونة من حين لآخر او تابعنا على تويتر


الأوسمة: , ,