| اشترك عبر RSS

سبع طرق للشغل على الإنترنت

25 February, 2010 | 32 تعليقات | مصنف في تجارة إلكترونية

المرة اللى فاتت اتكلمنا عن فوائد وعيوب الشغل على الإنترنت

انهاردة ان شاء الله هنذكر بعض انواع او طرق للشغل من على الإنترنت وهي

متجر إلكتروني

أشهر حاجة وغالبا اول حاجة بتيجي على دماغ الناس لما نتكلم عن تجارة  الكترونية. وعشان كدة ان شاء الله هنخصص له موضوع لوحده

تقديم خدمة

ممكن تعمل موقع تقدم من خلاله خدمات تحتاجها الشركات او يحتاجها الافراد زى مثلا التسويق على الإنترنت او الدعاية والاعلان او خدمات استشارية او تنظيم رحلات …الخ.. مثلا موقع اطلب بيقدم خدمة طلب الوجبات الغذائية عن طريق الإنترنت والخدمة دي بتكون للمحلات وللمستهلكين

انا شخصيا لما احب اطلب اكل بفتح موقع اطلب عشان الاقي افكار واشوف قوائم الطعام بتاعت المحلات

وفي الآخر بطلب من التليفون 🙂 … معرفش ليه

تحديث: تغلبت على خوفي الشديد من اني اطلب الأكل ويتأخر عليا وانا جعانة وجربت أخيرا اطلب من موقع otlob.com وكانت تجربة ممتازة حتى اني بقيت معظم الوقت بطلب من عليه بدلا من التليفون عشان قوائم الطعام بتكون امامي والاسعار كلها واضحة وكل حاجة … جربوه

استثمر موهبتك

لو عندك موهبة في الرسم او تصميم الجرافيكس ممكن تعمل موقع مخصوص تعرض فيه تصميماتك للبيع

انا بشتري تصميمات للتيشيرتات من بعض المواقع اللى زى كدة

وفي مواقع زي مثلا

deviantart او Redbubble

بتخليك تعرض تصاميمك وممكن تبيعها او ممكن بيطبعوها على تيشيرتات او اى منتجات تانية وانت بتكسب منها

لو واحدة بتعرف تطبخ كويس او تعمل حلويات ممكن تعمل نفس الفكرة وتعرض الحاجات دي على النت –

لو انت بتعرف تعمل فيدوهات وتستعمل برامج زى مثلا –

Adobe After Effects

Adobe Premiere

ممكن تقوم بعمل فيدوهات  دعائية للشركات الصغيرة بمقابل مادي معقول وكدة بدل ما الشركة تروح تدفع فلوس كتير لشركة دعاية واعلان عشان يعملولهم إعلان ويصوروه ويجيوا بنات ترقص ممكن لو شركة ميزانيتها قليلة تطلب منك عمل فيديو دعائي بشغل جرافيكس احترافي وبتكلفة قليلة

لو عايز تاخد فكرة وتتعلم ازاى تستخدم برنامج أفتر إفكتس في عمل فيديوهات بشكل إحترافي زى اللى بيتعمل في اعلانات الافلام كدة جرب الموقع دة

واهو ترحمونا شوية من اعلانات لبيسة انور اللى على القنوات الدينية

لأن القنوات الدينية عندها نسبة مشاهدة عالية جدا  و اسعار الاعلان فيها مش عالية يعني مغرية لأى شركة معلنة.. لكن الشركة لما بتعوز تعلن هناك بيلاقوا طبعا ان القنوات دي ليها شروط للاعلان وهى ان الاعلان ما يكنش فيه مزيكا وما يكونش فيه بنات.. فالشركات مش بتلاقي حد يعملها هذا النوع من الاعلانات ففي شركات بتحفظ ماء وجهها وتحافظ على اسمها وما تعلنش من الاصل وفي شركات مش بتلاقي قدامها غير لبيسة انور وامرها لله بقى

انت بقى ممكن تتخصص في هذا النوع من الاعلانات وتعمل عينات من شغلك وتضعها على موقعك وتقوم بالتسويق لنفسك بعد كدة و اكيد اكيد اكيد (ان شاء الله) الشركات اللى بتلجأ للبيسة انور دي هيفرحوا بيك اوي

توظيف

مفيش شك ان دة هيكون موقع عليه اقبال شديد جدا في ظل البطالة اللى احنا عايشينها

مزادات

بتخلي الناس تعرض بضاعتها للمزايدة على موقعك وانت ممكن تعمله باشتراك للعارضين او ممكن تاخد نسبة على كل عملية بيع تتم

Freelance  شغل مستقل

ممكن تعمل تصميم مواقع او عمل برامج او سكريبتات بناء على طلب الناس

استثمر خبرتك

بعض الناس بيكون عنده خبرة في مجال معين فبيعمل زى محاضرات على النت باشتراك  والناس بتحضرها عشان تستفيد من الخبرة دي .. زى مثلا محاضرات عن التسويق او عن الجرافيكس … الخ

دي بعض الأفكار لللشغل عن طريق النت وطبعا لو حد يحب يضيف طرق أخرى يا ريت

فوتوكوا بعافية

الأوسمة: , ,

عايز تعمل مشروع تجاري على الإنترنت؟

22 February, 2010 | 22 تعليقات | مصنف في تجارة إلكترونية

يلا يا شباب عايزين نقضي على البطالة

امبارح كنت بقرأ مقالة كاتبها صاحب شركة من اكبر شركات استضافة المواقع(هوستينج) على الإنترنت. وفعلا القصة كانت محفزة جدا وتشجع الناس انهم يشتغلوا في سن صغير ويعملوا مشروعات ممكن في يوم من الأيام تبقى من أكبر المشروعات في العالم.القصة هنا لو حد يحب يقراها

دي مش القصة الوحيدة طبعا أكيد معظمنا قرأ قصص شباب كتير عملوا مشاريع على الإنترنت وهما لسة في سن صغير والمشاريع دي بقت عالمية وكل الناس بتستخدمها زى مثلا

Youtube, Facebook, Twitter, Google, Hostgator

احنا كمان عايزين نستغل الإنترنت مش هقول عشان نخترع مشاريع كبيرة ، بس على الأقل على الأقل عشان نقلل من حجم البطالة اللى عندنا… يعني مثلا لو واحد مش لاقي شغل ومعاه شوية فلوس مش كتير (هنتكلم عن رأس المال بعدين) ممكن يحاول يبدأ بيهم مشروع على النت… بس إوعوا حد يسيب وظيفته عشان يبدأ مشروع جديدعلى النت.. احنا بنكلم الشباب اللى مش لاقي وظيفة ..آه مش نيجي نظبط الجاكتة البنطلون يضرب ونلاقي الناس سابت اشغالها ولاصت..  ممكن يعمل المشروع جنب الوظيفة لحد ما يعرف المشروع هينجح ولا لأ وبعدين يقرر .. لكن مش عايزين مجازفات الله يكرمكوا

الملاحظ ان الستات عاملين شغل كبير اوي على الفيسبوك … النساء قادمون يا شباب … انا دخلت صفحات كتير اوي عاملينها بنات وستات وبيبيعوا من خلالها ودي فكرة ممتازة لأى واحدة عايزة تشتغل من البيت

إن شاء الله هنبدأ سلسلة مقالات عن التجارة عبر الإنترنت .. انهاردة هنذكر فقط فوائد وعيوب هذه التجارة

فوائد التجارة على الإنترنت
  • انك بتشتغل من البيت … بالبيجاما يعني
  • ان وقتك بيكون ملكك… مفيش مواعيد شغل
  • انك ممكن تبدأ بأقل ميزانية .. طبعا يعتمد على مشروعك بس ممكن
  • انك بتكون رئيس نفسك … أنا المدييييييير
  • اننا ممكن نخفف الزحمة عن الشوارع
  • اننا ممكن نقلل من البطالة
  • انها فرصة لاثبات ذاتك
عيوب التجارة على الإنترنت
  • انها مش منتشرة في مصر .. ايوة دة عيب مش ميزة
  • ان الناس ممكن تخاف تشتري منك لانهم مش شايفينك ومش شايفين بضاعتك
  • ان ممكن ناس تشتغلك

بتحصلي والناس بتدخل تلعب بالبرنامج بتاع التصميم وتعمل اوردرات ولما اكلمهم تطلع النمرة غلط او تطلع صح ولما اسأله انت عملت اوردر يقول لي لأFree Userbars … يبقى أكيد بقى في حد غريب معانا في المغارة

  • إن مفيش مواعيد عمل

ايو ذكرتها في المميزات ودلوقتي بذكرها في العيوب لأن لو انت متعود على الوظيفة الحكومية انك بتروح الصبح تشرب شاي ومعاه شندوتش فول وتقرأ الجرايد وتلعب كاسحة الالغام واول ما الساعة تيجي خمسة الا ربع تنزل تروح يبقى ممكن تتعب لما تعمل شغل خاص لأنك  هتكون مسؤول عن كل شيء

  • إنك هتكون بتقوم بكل الشغل لوحدك .. لأن في البداية مش هتجيب موظفين

دي شوية عيوب بس ممكن التغلب عليها بسهولة ولو حد جه على دماغه عيوب او مميزات اكتر ياريت يشارك بيها

المرات القادمة ان شاء الله هنتكلم عن المتجر الالكتروني ، ازاى تعمل موقع الكتروني ، كيفية التسويق لمنتجاتك على الانترنت ، ازاى نستغل الشبكات الاجتماعية زى فيسبوك وتويتر … وحاجات تانية كتير … كل مرة هناخد موضوع ونحاول نتكلم فيه بالتفصيل ونعرف منكم اقتراحات ممكن تفيدنا وتفيد الناس

في تصويت هتلاقوه على اليمين في المدونة هنا يا ريت أعرف رأيكم … مش هياخد منكم وقت خالص

سؤال يطرح نفسه: وانتي بقى هتقولي للناس ازاى يعملوا مشاريع عشان في الآخر ينافسوكي؟

ج: أولا الرزق دة بتاع ربنا

ثانيا ماحبكش يعني لما تيجوا تعملوا مشروع تعملوه زى بتاعي بالظبط .. ما تغلسوش يعني

ملحوظة: الكلام اللى هنقوله معظمه هتلاقوه موجود على الانترنت باللغة الانجليزية في مواقع ومدونات غربية كتيرة اوي … يعني مش اختراع … انا هكتبه باللغة العربية عشان لو حد فعلا عايز يستفيد ما تبقاش اللغة حائل بينه وبين انه يعمل مشروع او يعمل حاجة ممكن تنجح في يوم من الايام وربنا يجعلنا سبب في هذا النجاح ان شاء الله

وفُتكم بعافية

الأوسمة: , ,

إزاى تشتري من على الإنترنت بدون حساب بنكي؟

15 February, 2010 | 34 تعليقات | مصنف في تجارة إلكترونية

ساعات بنكون عايزين نشتري حاجات من برة مصر عن طريق الانترنت بس بيكون المشكلة انك لازم تدفع عن طريق تحويل من البنك او عن طريق كروت الإئتمان اللى مخاطرها كتيرة اوي على النت

مثلا وانا بكتب الموضوع دة عملت بحث في جوجل عن كروت الائتمان وصادفت منتدى بتاع هاكرز بيقول “كل ما يتعلق باستخدام وسحب وسرقة بطاقات الائتمان وكيفية التعامل معها”  وعاملين كمان سحب على بطاقات الائتمان المسروقة!!! … ودي حاجة منتشرة جدا ولو حصلت معاك ممكن يتخرب بيتك

اذكر اني لما كنت في الجامعة كان معانا ناس بيشتروا حاجات من على الانترنت ببطاقات ائتمان مسروقة وبعد كدة يبيعوها وكله على خساب صاخب المخل الغلبان

المهم … في حل تاني كويس اوي ( لا ما تخافوش مش لبيسة انور) وهو كروت فيزا مسبقة الدفع

Visa Prepaid Card

اللى مش راضي يدخل مصر ضمن الدول المشتركة فيه Paypal ولا الحوجة لل

دي بقى ليها ميزات كتير اهمها

انها بدون حساب بنكي … يعني مفيش ربا لان البنك مش بيدفع حاجة بدالك انت اللى بتشحن الكارت وبتصرف على قد اللى شحنته بس

انها  لو مش عليها فلوس مش هينفع حد يشتري بيها حاجة … ودي ميزة طبعا لان لو (اللهم احفظنا) الهاكر دخل على جهازك واخد رقم البطاقة مش هيقدر يشتري غير بالمبلغ اللى موجود عليها فقط

وفي الحالة دي انت ممكن تأمن نفسك بانك ببساطة ما تسيبش عليها فلوس غير لما تكون ناوي تشتري حاجة تروح تشحنها في نفس اليوم وتدخل تشتري بيها علطول

انك ممكن تستخدمها في اى موقع بيقبل كروت فيزا او عليه علامة فيزا … ودي تقريبا معظم المواقع اللى اتعاملت معاها

انك بتكون متحكم في مصاريفك ومش بتجيلك فاتورة آخر الشهر تخضك وتجيبلك كرشة نفس

انها مصاريف اصدارها واجراءاتها بسيطة جدا

ارخص بنك شفته بيعملها هو كريدي اجريكول ب15 جنيه فقط وصورة البطاقة وبتستلمها في نفس الوقت علطول

طريقة استخدامها

فقط بتذهب لأى مكينة صراف آلي من ماكينات البنك تكون بتقبل اموال يعني تقدر تدخل فيها فلوس … والبنك بيديك ورقة مكتوب فيها عناوين الماكينات… وبعدين تحط المبلغ اللى انت عايزه في المكنة …. بس خلاص

وممكن طبعا تسحب فلوس في اى وقت من المكنة مادام في فلوس انت حاططها وما صرفتهاش

كدة ممكن بسهولة تشتري من على مواقع كتير جدا برة مصر … بس ساعات بيكون في مشكلة وهى ان الموقع مثلا لو في امريكا ومش بيشحن غير داخل امريكا فقط

دي بردو ليها حل عملته شركة أرامكس وهى خدمة

Shop & Ship

دي بتشترك فيها وبتدفع تقريبا 200 جنيه مرة واحدة فقط وبيفتحولك زى صندوق بريد في امريكا و انجلترا ويدوك عنوانه وانت لما تيجي تشتري من المواقع اللى ما بتشحنش برة امريكا بتكتب العنوان دة وتروح الشحنة على هناك ومن هناك تتحول علطول على مصر وتوصلك كمان لحد البيت لانهم بيعملولك التخليص الجمركي بمقابل مادي من 25 الى 50 جنيه

يلا فوتكم بعافية

الأوسمة: , ,