سبع طرق للشغل على الإنترنت
المرة اللى فاتت اتكلمنا عن فوائد وعيوب الشغل على الإنترنت
انهاردة ان شاء الله هنذكر بعض انواع او طرق للشغل من على الإنترنت وهي
متجر إلكتروني
أشهر حاجة وغالبا اول حاجة بتيجي على دماغ الناس لما نتكلم عن تجارة الكترونية. وعشان كدة ان شاء الله هنخصص له موضوع لوحده
تقديم خدمة
ممكن تعمل موقع تقدم من خلاله خدمات تحتاجها الشركات او يحتاجها الافراد زى مثلا التسويق على الإنترنت او الدعاية والاعلان او خدمات استشارية او تنظيم رحلات …الخ.. مثلا موقع اطلب بيقدم خدمة طلب الوجبات الغذائية عن طريق الإنترنت والخدمة دي بتكون للمحلات وللمستهلكين
انا شخصيا لما احب اطلب اكل بفتح موقع اطلب عشان الاقي افكار واشوف قوائم الطعام بتاعت المحلات
وفي الآخر بطلب من التليفون 
… معرفش ليه
تحديث: تغلبت على خوفي الشديد من اني اطلب الأكل ويتأخر عليا وانا جعانة وجربت أخيرا اطلب من موقع otlob.com وكانت تجربة ممتازة حتى اني بقيت معظم الوقت بطلب من عليه بدلا من التليفون عشان قوائم الطعام بتكون امامي والاسعار كلها واضحة وكل حاجة … جربوه
استثمر موهبتك
لو عندك موهبة في الرسم او تصميم الجرافيكس ممكن تعمل موقع مخصوص تعرض فيه تصميماتك للبيع
انا بشتري تصميمات للتيشيرتات من بعض المواقع اللى زى كدة
وفي مواقع زي مثلا
deviantart او Redbubble
بتخليك تعرض تصاميمك وممكن تبيعها او ممكن بيطبعوها على تيشيرتات او اى منتجات تانية وانت بتكسب منها
لو واحدة بتعرف تطبخ كويس او تعمل حلويات ممكن تعمل نفس الفكرة وتعرض الحاجات دي على النت -
لو انت بتعرف تعمل فيدوهات وتستعمل برامج زى مثلا -
Adobe After Effects
Adobe Premiere
ممكن تقوم بعمل فيدوهات دعائية للشركات الصغيرة بمقابل مادي معقول وكدة بدل ما الشركة تروح تدفع فلوس كتير لشركة دعاية واعلان عشان يعملولهم إعلان ويصوروه ويجيوا بنات ترقص ممكن لو شركة ميزانيتها قليلة تطلب منك عمل فيديو دعائي بشغل جرافيكس احترافي وبتكلفة قليلة
لو عايز تاخد فكرة وتتعلم ازاى تستخدم برنامج أفتر إفكتس في عمل فيديوهات بشكل إحترافي زى اللى بيتعمل في اعلانات الافلام كدة جرب الموقع دة
واهو ترحمونا شوية من اعلانات لبيسة انور اللى على القنوات الدينية
لأن القنوات الدينية عندها نسبة مشاهدة عالية جدا و اسعار الاعلان فيها مش عالية يعني مغرية لأى شركة معلنة.. لكن الشركة لما بتعوز تعلن هناك بيلاقوا طبعا ان القنوات دي ليها شروط للاعلان وهى ان الاعلان ما يكنش فيه مزيكا وما يكونش فيه بنات.. فالشركات مش بتلاقي حد يعملها هذا النوع من الاعلانات ففي شركات بتحفظ ماء وجهها وتحافظ على اسمها وما تعلنش من الاصل وفي شركات مش بتلاقي قدامها غير لبيسة انور وامرها لله بقى
انت بقى ممكن تتخصص في هذا النوع من الاعلانات وتعمل عينات من شغلك وتضعها على موقعك وتقوم بالتسويق لنفسك بعد كدة و اكيد اكيد اكيد (ان شاء الله) الشركات اللى بتلجأ للبيسة انور دي هيفرحوا بيك اوي
توظيف
مفيش شك ان دة هيكون موقع عليه اقبال شديد جدا في ظل البطالة اللى احنا عايشينها
مزادات
بتخلي الناس تعرض بضاعتها للمزايدة على موقعك وانت ممكن تعمله باشتراك للعارضين او ممكن تاخد نسبة على كل عملية بيع تتم
Freelance شغل مستقل
ممكن تعمل تصميم مواقع او عمل برامج او سكريبتات بناء على طلب الناس
استثمر خبرتك
بعض الناس بيكون عنده خبرة في مجال معين فبيعمل زى محاضرات على النت باشتراك والناس بتحضرها عشان تستفيد من الخبرة دي .. زى مثلا محاضرات عن التسويق او عن الجرافيكس … الخ
دي بعض الأفكار لللشغل عن طريق النت وطبعا لو حد يحب يضيف طرق أخرى يا ريت
فوتوكوا بعافية
مقالات أخرى
May 8th, 2010 بتمام 12:28 pm
السلام عليكم ورحمه الله وبركاته
احب ان اشكر حضرتك على قيمه هذه المعلومات
ولكن ممكن حضرتك تجاوبنى بمنتهى الصراحه عن رايك فى الشغل عن طريق الانترنت
وما هى المخاطر من ورائه
وشكرا
من لاالله الاالله
May 8th, 2010 بتمام 3:43 pm
وعليكم السلام ورحمة الله وبركاته
طبعا الشغل عن طريق الانترنت له عيوب ايضا وانا كنت كتبتها في المقال دة : http://blog.ooshi.net/67/%D8%B9%D8%A7%D9%8A%D8%...
مثلا انه مش منتشر اوي في العالم العربي ودة بيخلي الناس تشتري منك بحذر شديد لانهم مش متعودين يشتروا حاجة من غير ما يشوفوها وبالتالي بيكون عليك مجهود كبير انك تبني ثقة عند الناس وتعطيهم الضمانات الكافية
أيضا هناك مشكلة في طرق الدفع لان الناس مش بتحب تستخدم الفيزا على الانترنت فالطريقة الوحيدة اللى تخليك تبيع للناس في مصر هى انك تخليهم يدفعوا عند الاستلام ودة بيكون فيه عيوب طبعا ان احيانا بيكون فيه عدم جدية من اللى طلب السلعة ودة بيضيف عليك مجهود تاني انك لازم تتأكد انه جاد عن طريق مكالمته في التليفون قبل ارسال الشحنة حتى لا تتحمل انت تكاليف الشحن على الفاضي
لكن لا شك ان التجارة الالكترونية هى مستقبل التجارة في العالم .. دلوقتي معظم الماركات العالمية اصبح لها متاجر على الانترنت والناس اسهلها تطلب الحاجة وتوصلها لحد البيت وكمان اصبح هناك مواقع في العالم العربي تسهل وتشجع عملية التجارة الالكترونية مثل موقع Souq.com دة بيخليك تبيع وتشتري بأمان تام وانا شخصيا بحب البيع عن طريقه وان شاء الله هكتب مقال مخصوص عنه
أنت سألت عن المخاطر فأحب ان انبهك الى مشكلة ربما لا تواجهها ولكن بردو هقولك عليها . بعض البائعين اللى عندهم حساب على موقع مثل
Paypal
بيواجهوا احيانا محاولات نصب .. يعني مثلا لأن هذا الموقع عايز يوفر أمان للمشترين عن طريق حمايتهم من نصب البائعين وذلك ان المشتري اذا دفع ثمن سلعة ولم تصله يبلغ الموقع فيعيد اليه المبلغ. للأسف بعض الناس بيستغلها استغلال سيء وبيروح طالب حاجة غالية ويعد ما تصله يقدم شكوى ضد البائع عشان يسترد امواله مع انه أخذ السلعة. عشان كدة دايما لما تشحن حاجة وتكون بتستخدم مواقع للدفع زى باىبال لازم تأمن نفسك عن طريق الشحن عبر شركة محترمة تجعلها تأخذ امضاء من العميل انه استلم الشحنة حتى يكون عندك اثبات انه استلمها . هناك موقع آخر مثيل اسمه
Moneybookers
وهو افضل من هذه الناحية انه بيحمك من الحاجت دي وانا شخصيا عملت حساب فيه عشان لو حد طلب منى من خارج مصر وأصلا احنا في مصر غير مسموح لنا بانشاء حسابات على باىبال فالبديل لنا هو هذا الموقع
و بالتوفيق ان شاء الله في تجارتك
—————————————————————
ملحوظة: معذرة انا عدلت تعليقك لانه كان فيه خطأ بسيط في عبارة لا اله الا الله (كان مكتوب لا الله الا الله) فعدلتها وارجو قبول اعتذاري
July 1st, 2010 بتمام 6:27 pm
[...] الوصلة : http://blog.ooshi.net/96/سبع-طرق-للشغل-على-الإنترنت/ [...]
July 2nd, 2010 بتمام 8:14 pm
رائع
جزاك الله خير
استفدت كثيرا
July 2nd, 2010 بتمام 8:22 pm
جزانا واياكم ..ومرحبا بك في المدونة
August 19th, 2010 بتمام 12:41 am
السلام عليكم ورحمة الله وبركاته
مبارك عليكم شهر رمضان شهر المغفرة والاحسان
عزيزي القدير
لك الشكر ووافر الامتنان
على هذا الموضوع القيم والذي له اهميه كبيره في تطوير الذات
واكتساب خبرات ومهرات ..
الله يجزاك كل خير ويعم بنفعة الجميع
محبك في الله
ابو سلطان
August 19th, 2010 بتمام 3:41 pm
ِشكرا لك انت على تعليقك يا زكي
انا فعلا بفكر بجدية اني ابطل طريقة الدفع عند الاستلام والجأ لطرق الدفع على الانترنت مثل موقع
Moneybookers
August 19th, 2010 بتمام 11:23 am
أشكرك أخي ابو سلطان على هذا التعليق المشجع
كل عام وانتم بخير
August 19th, 2010 بتمام 3:01 pm
شكرا جدا على المقالات الرائعة ديه
وبالنسبة لطرق الدفع فى دولقتى الحساب البنكى
كمان العميل يقدر يبعت على اى بنك لو ما عندكش حساب
انا مصمم جرافيك
يسعدنى التعاون معك
http://www.zaki-designer.com
August 22nd, 2010 بتمام 4:06 am
جزاكم الله خيرا يا فندم مقال جميل ومدونتك كلها رائعة ومفيدة
انا كنت بدور فعلا على موضوع الشغل على النت بس انا كنت عايز اسئل على حاجة معينة وهى الشغل على النت من غير ما يكون عندك موقع يعنى تشتغل بالساعة مثلا من البيت بمقابل تتفق عليه مع صاحب العمل نظير خدمات معينة انك مثلا تتباع موقعه او يبعتلك شغل تنفذه من البيت جرافيك او برمجة او اى شيىء كانك موظف عنده بس من البيت
يعنى انا اسمع عن الموضوع دة منتشر برة بس معرفش فى مصر هنا ايه ظروفه ياريت لو عند حضرتك معلومات تفيدنا بيها وجزاكم الله خيرا وكل سنة وانتى طيبة ورمضان كريم
August 22nd, 2010 بتمام 6:06 am
كل سنة وانت طيب يا حسام
هو فعلا فيه مواقع برة كتير بتقدم الخدمة دي وهى انك تعرض خدماتك عليها وبيكون فيه ناس في نفس الوقت بتطلب خدمات يتم انجازها عن بعد ويكون الاتفاق وكل حاجة عن طريق الانترنت زى مثلا موقع
http://www.elance.com/
دة انت ممكن تشترك فيه وتعرض خدمتك لان مش شرط ان طالب الخدمة يكون من نفس البلد اللى انت فيها مادام الشغل كله على النت
أما اذا كنت تفضل موقع عربي وتتعامل مع عرب فهناك موقع كان وصلني اعلانه من فترة له نفس الفكرة ونفس آليه العمل وهو موقع
http://www.khedmah.com
بردو بتسجل فيه وتحدد اختصاصاتك وتعرضها وتلاقي ناس طالبة خدمات و بيتم الاتفاق على السعر ومدة التنفيذ وبيكون الموقع وسيط بينك وبين الطرف الآخر مقابل 10% من الأجر والأهم ان الموقع هو اللى بيتولى تنظيم طريقة الدفع عشان ما يحصلش مشاكل
هو الموقع لسة تجريبي وفي الأول يعني العروض مش كتيرة اوي بس دة معناه بردو ان المنافسة مش شديدة … جربه يمكن يعجبك
بس نصيحة مني يا حسام حتى لو مش عندك موقع على الاقل اعمل لنفسك مدونة او صفحة على الفيس بوك تعرض عليها اعمالك لأن انا مثلا لو هطلب خدمة من حد على الانترنت وجائني عروض كثيرة هحب اشوف اعمال الناس دي الاول واختار على اساس شغلهم السابق
رمضان كريم