عايز تعمل مشروع تجاري على الإنترنت؟
يلا يا شباب عايزين نقضي على البطالة
امبارح كنت بقرأ مقالة كاتبها صاحب شركة من اكبر شركات استضافة المواقع(هوستينج) على الإنترنت. وفعلا القصة كانت محفزة جدا وتشجع الناس انهم يشتغلوا في سن صغير ويعملوا مشروعات ممكن في يوم من الأيام تبقى من أكبر المشروعات في العالم.القصة هنا لو حد يحب يقراها
دي مش القصة الوحيدة طبعا أكيد معظمنا قرأ قصص شباب كتير عملوا مشاريع على الإنترنت وهما لسة في سن صغير والمشاريع دي بقت عالمية وكل الناس بتستخدمها زى مثلا
Youtube, Facebook, Twitter, Google, Hostgator
احنا كمان عايزين نستغل الإنترنت مش هقول عشان نخترع مشاريع كبيرة ، بس على الأقل على الأقل عشان نقلل من حجم البطالة اللى عندنا… يعني مثلا لو واحد مش لاقي شغل ومعاه شوية فلوس مش كتير (هنتكلم عن رأس المال بعدين) ممكن يحاول يبدأ بيهم مشروع على النت… بس إوعوا حد يسيب وظيفته عشان يبدأ مشروع جديدعلى النت.. احنا بنكلم الشباب اللى مش لاقي وظيفة ..آه مش نيجي نظبط الجاكتة البنطلون يضرب ونلاقي الناس سابت اشغالها ولاصت.. ممكن يعمل المشروع جنب الوظيفة لحد ما يعرف المشروع هينجح ولا لأ وبعدين يقرر .. لكن مش عايزين مجازفات الله يكرمكوا
الملاحظ ان الستات عاملين شغل كبير اوي على الفيسبوك … النساء قادمون يا شباب … انا دخلت صفحات كتير اوي عاملينها بنات وستات وبيبيعوا من خلالها ودي فكرة ممتازة لأى واحدة عايزة تشتغل من البيت
إن شاء الله هنبدأ سلسلة مقالات عن التجارة عبر الإنترنت .. انهاردة هنذكر فقط فوائد وعيوب هذه التجارة
فوائد التجارة على الإنترنت
- انك بتشتغل من البيت … بالبيجاما يعني
- ان وقتك بيكون ملكك… مفيش مواعيد شغل
- انك ممكن تبدأ بأقل ميزانية .. طبعا يعتمد على مشروعك بس ممكن
- انك بتكون رئيس نفسك … أنا المدييييييير
- اننا ممكن نخفف الزحمة عن الشوارع
- اننا ممكن نقلل من البطالة
- انها فرصة لاثبات ذاتك
عيوب التجارة على الإنترنت
- انها مش منتشرة في مصر .. ايوة دة عيب مش ميزة
- ان الناس ممكن تخاف تشتري منك لانهم مش شايفينك ومش شايفين بضاعتك
- ان ممكن ناس تشتغلك
بتحصلي والناس بتدخل تلعب بالبرنامج بتاع التصميم وتعمل اوردرات ولما اكلمهم تطلع النمرة غلط او تطلع صح ولما اسأله انت عملت اوردر يقول لي لأ
… يبقى أكيد بقى في حد غريب معانا في المغارة
- إن مفيش مواعيد عمل
ايو ذكرتها في المميزات ودلوقتي بذكرها في العيوب لأن لو انت متعود على الوظيفة الحكومية انك بتروح الصبح تشرب شاي ومعاه شندوتش فول وتقرأ الجرايد وتلعب كاسحة الالغام واول ما الساعة تيجي خمسة الا ربع تنزل تروح يبقى ممكن تتعب لما تعمل شغل خاص لأنك هتكون مسؤول عن كل شيء
- إنك هتكون بتقوم بكل الشغل لوحدك .. لأن في البداية مش هتجيب موظفين
دي شوية عيوب بس ممكن التغلب عليها بسهولة ولو حد جه على دماغه عيوب او مميزات اكتر ياريت يشارك بيها
المرات القادمة ان شاء الله هنتكلم عن المتجر الالكتروني ، ازاى تعمل موقع الكتروني ، كيفية التسويق لمنتجاتك على الانترنت ، ازاى نستغل الشبكات الاجتماعية زى فيسبوك وتويتر … وحاجات تانية كتير … كل مرة هناخد موضوع ونحاول نتكلم فيه بالتفصيل ونعرف منكم اقتراحات ممكن تفيدنا وتفيد الناس
في تصويت هتلاقوه على اليمين في المدونة هنا يا ريت أعرف رأيكم … مش هياخد منكم وقت خالص
سؤال يطرح نفسه: وانتي بقى هتقولي للناس ازاى يعملوا مشاريع عشان في الآخر ينافسوكي؟
ج: أولا الرزق دة بتاع ربنا
ثانيا ماحبكش يعني لما تيجوا تعملوا مشروع تعملوه زى بتاعي بالظبط .. ما تغلسوش يعني
ملحوظة: الكلام اللى هنقوله معظمه هتلاقوه موجود على الانترنت باللغة الانجليزية في مواقع ومدونات غربية كتيرة اوي … يعني مش اختراع … انا هكتبه باللغة العربية عشان لو حد فعلا عايز يستفيد ما تبقاش اللغة حائل بينه وبين انه يعمل مشروع او يعمل حاجة ممكن تنجح في يوم من الايام وربنا يجعلنا سبب في هذا النجاح ان شاء الله
وفُتكم بعافية
انضم لجمهورية التي شيرتات على فيس بوك
مقالات أخرى
