| اشترك عبر RSS

لما تشتري تي شيرت من على النت

January 19th, 2011 مصنف في تي شيرت

الحاجات اللى تاخد بالك منها لما تيجي تشتري تي شيرت من على النت

لما بنشتري أى حاجة من على النت وخصوصا الملابس بنكون خايفين إن الحاجة دي تطلع غير ما احنا متوقعين او تطلع مش مناسبة لينا. ودة لما بيحصل مع حد مرة غالبا بيبطل يشتري من على النت تاني عشان بيحس ان العملية بتبقى بالحظ اكتر من اى حاجة تانية

بس بصراحة دة مش صحيح أوي. المشكلة ان معظم الناس لما بتيجي تشتري مش بتاخد بالها اوي من مواصفات السلعة او يمكن بتلاقي ارقام وخامات وحاجات هى مش عارفاها فمش بتهتم بالتفاصيل دي وبتشتري علطول. وفي ناس حتى مش بتبص على جدول المقاسات وبتختار المقاس اللى هى متعودة عليه علطول.

احنا هنقول شوية حاجات ومصطلحات لو أخدت بالك منها لما تيجي تطلب تي شيرت من على النت الحاجة هتطلع زى ما انت متوقع ان شاء الله.

خامة التي شيرت

أهم حاجة هى الخامة

مش كفاية ان يكون مكتوب

100% cotton

لأن بصراحة دة مش بيقول كتير عن نوعية الخامة. لو بصيت على معظم التيشيرتات اللى عندك في البيت و القمصان والبنطلونات هتلاقي مكتوب عليها 100% قطن لكن طبعا هتلاقي اختلاف كبير بين نوعيات القماشة. دة بيرجع لطريقة غزل القطن وعمل القماش

يعني مثلا عمرك ما اشتريت تي شيرت 100% قطن وطلعت القماشة خشنة او ناشفة؟

لو عايز التي شيرت تطلع مريحة في اللبس وطرية يبقى أفضل حاجة ان القطن يكون

ringspun combed cotton

ممكن تلاقي مكتوب فقط ringspun او combed بس في النهاية دة دليل على نعومة القماشة وجودتها

يعني ببساطة كدة الفايبر بيتم تمشيطه فبتتشال منه الشوائب وبيبقى متناسق جنب بعضه وكله نفس الطول فبتطلع القماشة ناعمة وطرية

طبعا لو انت بتشتري على الطبيعة مش هتكون محتاج تعرف المصطلحات دي لأنك هتعاين الحاجة بنفسك وهتلمسها لكن لو بتشتري من على النت يبقى احسن يكون عندك دراية بالمصطلحات دي.

النوعية دي من القماش بتكون غالية لأنها أعلى حاجة فمش كل الناس بتستعملها فلو لقيت مكتوب بس

100% cotton

يبقى انت وحظك ممكن تطلع ناعمة وممكن لأ

وزن التي شيرت

عارف لما تجيب تي شيرت وتطلع خفيفة اوي او تتطلع ثقيلة وبتحرر؟ دة بيرجع لوزن القماش الى مصنوع منه التي شيرت

مثلا التي شيرتات الخفيفة بيكون وزن قماشتها تقريبا

140 gsm

والثقيلة أوي بتكون تقريبا

220 gsm

والمتوسط بيكون 150 الى 160

(gsm= grams per square meter)

دة معناه ان كل متر مربع من القماش بيكون وزنه كذا جرام (الرقم المكتوب) جرام

موضوع الوزن دة مهم عشان اولا احنا في بلد حر وثانيا فيه ناس بتفضل التيشيرتات الثقيلة اكتر والعكس صحيح. يعني مثلا التي شيرتات الخفيفة موضة ففي ناس بتحبها اكتر من غيرها. فإنت بتختار على حسب الوزن اللى بيكون مكتوب امامك وانت بتفضل ايه وفيه مواقع بتديك اكتر من اختيار لوزن التيشيرت اللى هيطبع عليه الرسمة

قصة التي شيرت

او زي ما بيقولوا:التلبيس

يعني التي شيرت شكلها ايه في اللبس.. ودي بتبان من الصور اللى معروضة على الموقع لو حاطط صور طبيعية لناس لابسين التي شيرتات اللى بيبيعها

وكمان ممكن بتتعرف من وصف السلعة

فيه تي شيرتات بتكون مثلا مكتوب عليها

slim fit or fashion fit

يعني بتكون ماسكة شوية على الجسم وفي تي شيرتات عادية اللى هى القصة العادية الواسعة

دة بيكون مهم انك تعرفه أولا عشان ممكن تكون انت بتكره التي شيرت تكون ماسكة او العكس.. يعني بيرجع لطريقة لبسك

وكمان مهم عشان لما تيجي تختار المقاس تبقى عامل حسابك

مقاس التي شيرت

دة من اهم الحاجت لأن التي شيرت نفسها لو كويسة بس طلعت مش مقاسك يبقى مش هتعرف تلبسها وهتكون دفعت فلوس على الفاضي.

بصراحة من خلال شغلي في المجال دة احب اقولكم ان اغلبية الناس مش بتبص على جدول المقاسات وبتطلب دايما المقاس اللى هما متعودين عليه ولو طلع مش مقاسهم بيزعلوا مننا

المشكلة ان زى ما قلنا ان  مقاسك نفسه ممكن يختلف من قصة لتانية ودة طبيعي وكمان ممكن اوى يختلف من شركة لتانية. عشان كدة مهم جدااااا انك تشوف جدول المقاسات على الموقع اللى هتشتري منه وتقارن القياسات بتيشيرت تكون مظبوطة عليك عندك في البيت

إن شاء الله لو اتبعت الخطوات اللى فوق دي هتشتري الحاجة وتطلع زى ما انت متوقع ومش هتتصدم صدمة تخليك تكره النت واللى جابوا النت واللى عايزين يشتروا من على النت