| اشترك عبر RSS

كيف تستخدم تويتر

January 15th, 2011 مصنف في شبكات إجتماعية

بعكس ما يعتقد الناس تويتر ليس شبكة إجتماعية!

ايوة حتى أصحاب الشركة نفسهم قالوا كدة

تويتر موقع لمعرفة الأخبار وقت حدوثها.. فهو اسرع من الجزيرة والعربية والسي إن إن ومنى الشاذلي ..

بمجرد ما الخبر يحصل ممكن تلاقي ناس بتكتب على تويتر من مكان وقوع الحادث و مش شرط يكون حادث حتى لو مؤتمر ممكن تتابع فعالياته لحظه بلحظة من على تويتر من خلال تحديثات الناس اللى موجودة هناك وهنقول إزاى

الأول بس نقول بعض التعريفات عشان الناس اللى مش عارفة تويتر كويس

  • Following

بعكس الفيسبوك او الشبكات الاجتماعية التانية فنوع العلاقة على تويتر مش علاقة صداقة متبادلة.. يعني مش بتبعت طلب اضافة لواحد وهو يقبلك فانتوا الاتنين تشوفوا اللى بتكتبوه .. لأ على تويتر انت بتعمل فولو او متابعة لأى حد انت عايز تعرف هو بيكتب ايه او أى شركة انت عايز تعرف اخبارها او قناة اخبارية او مجلة او لعيب كورة ومش لازم هو يتابعك..عشان كدة هى مش شبكة اجتماعية

لكن طبعا لو عندك اصحاب عليه اكيد الموضوع هيكون متبادل

أنا حبيت اوضح الحتة دي لأن فيه ناس لما بتتعامل مع تويتر على انه شبكة اجتماعية وبتلاقي ان ماعندهاش اصحاب هناك بتزهق منه وتسيبه مع انه موقع مفيد جدا في رأيي الشخصي وأحسن من فيس بوك بالنسبة لي

  • Tweet

دة الجملة او التحديث اللى انت بتكتبه على تويتر يعني زى الStatus على الفيس بوك كدة

  • Retweet

لما حد بيعجبه اللى انت كتبته بيعمله ريتويت عشان ينشره يعني زى Share

  • Mentions@

لو حد عايز يكتب تويت موجهة ليك انت شخصيا هيعملك Mention

يعني هيكتب اسمك وقبله العلامة دي @

كدة التويتة دي هتظهر عندك تحت تبويبة ال Mentions@ عشان في حالة اذا كان اللى بعتلك التويتة دي انت مش متابعه تقدر تشوف هو كتبلك ايه وترد عليه

لما بتكتب مينشن لحد اللى متابعينك مش هيشوفوها الا اذا كانوا متابعين كمان الحد دة فهتظهر عندهم كمان

يعني لو عايز تبعت رسالة خاصة لواحد ماحدش يشوفها غيره ما تستعملش دي

استعمل الDirect Message

  • Hashtags

دي من أهم خصائص تويتر. الهاش تاج هو عبارة عن كلمة مسبوقة بهذه العلامة # . لو ضغطت على الكلمة دي هتظهرلك كل التويتات اللى مذكور فيها نفس الهاش تاج دة

دة بيكون مفيد لما بيكون فيه حدث مهم وعايزين نتابعه كلنا فبنوحد الهاش تاج وكل واحد فينا بيكتب عن الحدث دة بيكتب الهاش تاج دة في الجملة فتظهر التويتة بتاعته عند كل الناس اللى متابعين الهاش تاج دة

مثال: انهاردة وانا بكتب التدوينة دي من اهم الاحداث اللى حاصلة الثورة بتاعت تونس

فالناس كانوا عاملينلها هاش تاج اسمه sidibouzid#

لو بحثت عن الكلمة دي على تويتر او ضغطت عليها هتظهر لك النتائج كلها من جميع انحاء العالم اللى بتتكلم عن الثورة

عشان كدة تويتر مهم جدا في الأخبار

وكمان في متابعة فعاليات اى حدث .. يعني مثلا لما بيكون فيه مؤتمر ويكون في بلد تانية الناس اللى بتحضر بكتب على تويتر عشان الناس اللى ما حضرتش تبقى متابعة عن طريق هاش تاج موحد مخصوص بنتفق عليه مسبقا او بيكون محدد من الجهة المنظمة

  • Trending

دي بتبقى المواضيع اللى منتشرة على تويتر بسرعة في يوم معين او في ساعة معينة. يعني ناس كتير بتتكلم عنها

دي بتكون مفيده لما بيكون فيه حدث عايزين نوصله للناس في كل العالم . مثلا أيام حرب غزة الناس اتفقوا انهم يعملوا هاش تاج اسمه Gaza# وكله يكتب عنه ويستعمله فلما عددنا زاد اوي الهاش تاج دة حصله Trending يعني ظهر عن كل مستخدمي تويتر في القائمة اللى في الجنب اللى اسمها Trends

يعني انهاردة مثلا كان من ضمن الحاجت اللى حصلها تريندينجBen Ali .. الف الف مبروك

عشان تستمتع بتويتر اعمل فولو للناس اللى انت بتحبهم وبتحب تسمع اخبارهم او للشركات اللى عايز تعرف عروضها واخبارها او الصحفيين او المواقع والمدونات اللى بتتابعها او شخصيات عامة.. والميزة في تويتر ان الشخصيات العامة بيكونوا هما بنفسهم اللى بيكتبوا التحديثات يعني ممكن تتواصل معاهم مباشرة.

في الاول مش هتستمتع بتويتر خالص وهتحس انك تايه وعايز تجري عالفيس بوك حيث الاصحاب والصور والفارم فيل

لكن بعد فترة هتحبه وهتقعد عليه كتير وهتنزله على تليفونك .. وعلى فكرة هو مش كله كآبة يعني فيه ناس ظريفة بردو وساعات يتفقوا على هاش تاج خيالي كله هزار وكل واحد يتخيل  ويكتب اللى هو عايزه من باب التغيير يعني

الأوسمة: ,
  • thnx ya o0o0oshi ya gamed ta3benkom ma3ana wallahy
    bgad ana zay ma kont kateb keda 3ala oshi page on facebook en ana 3andy twitter account men awel ma et3amal L twitter ka site asasn bas makontesh mostamte3 beah 5ales wala kont 3aref asta5demo ezay bas 5alas ana 3aref ezay asta5demo w hoa fe3lan keda b L tare2a d mesh social net work w de L meza elly feaaah bgad thnx ya oshi 3ala L mosa3da

    • العفو يا محمد .. على ايه دة شرح بسيط
      ان شاء الله لما تتعود عليه هيعجبك اكتر

      • Rafateasy

        أنت بتعلم الناس أو الصحاب على التويتر وأنا مين يعلمنى على الفيس بوك ان معى ربى سيهدين

  • Sallysabry

    Thxxx ya ooshii mofida gedan thxxx

  • Hamoksha_7amoo

    شكرا فعلا علي الموضوع انا بجد اول مره اعرف الحاجات ده وكنت ناوي اجرب التويتر وان شاء الله اجربه

  • Mohamed elboghdadi

    انا عارف التويتر من زمان وشغال عليه بس كنت بدور على موقع يعلم اصحابى الى عوزين يدخلوا على التويتر وهبطت من كتر الشرح لكل واحد منهم فانتا وفرت على كتير وخدت ثواب رائع ربنا يباركلك فيه وشكرا انك ريحتنى

    • العفو يا محمد .. ربنا يباركلك

  • Asmhn1992

    كيف اشوف اخبار الممثلين ؟؟؟؟؟؟؟؟؟؟؟؟؟؟؟؟؟

  • شكرا لكم على حسن المعلومه القيمه بارك الله فيكم ونفع بكم

  • شكرا لكم على حسن المعلومه وبارك الله فيكم ونفع بكم

    • شكرا لك استاذ جمال ونفع الله بكم

  • Little Love20

    ارجوكم ساعدونى … لما حد بيعملى reply مش بيظهر عندى مش عارفة ايه السبب ياريت حد يساعدنى

  • megoali667@yahoo.com

    انا مش عارفة ابعت طلب ع التويتر ممكن اعرف

  • Mayar Yosef

    صراحة يعني مش كل شي فهمت

  • Mayar Yosef

    بدي اسال هل ينفع اكلم صحابي من توتير متل الفيس كيف

  • نورا الراوي

    جزاكو الله خيرا

  • نورا الراوي

    انا بي سرحه كنت عيزه اعرف ازاي اكتب علي الدردش زي مسلن علي الفيس بوك لي اصحابي بس والله انا متشكره جدا

  • ابو اياد

    يعني فيه غرف شات وكده