| اشترك عبر RSS

أفضل طريقة للدفع في الشرق الأوسط

July 11th, 2010 مصنف في تجارة إلكترونية

الدفع عند الاستلام طبعا

لأ.. غلط

الطريقة دي احنا عايزين ننسفها اصلا .. ماحدش بقى بيستعملها في التجارة الالكترونية غيرنا للاسف الشديد… ولو فضلنا نستعملها يبقى عمرنا ما هنستعمل الدفع الالكتروني اللى هو من اساسيات التجارة الالكترونية

مش عارفة ليه محسسيني اننا متخلفين او اقل من غيرنا ولازم يكون لينا طرق دفع مخصوصة .. زى ما يكون معانا شهادة مكتوب عليها :”يعامل معاملة الأطفال،ما تخلوهوش يدفع على النت”!

للأسف الطريقة دي لو فضلنا ماشيين عليها ممكن نقضي على التجارة الالكترونية خالص… ازاى؟

هقول مثال بسيط: في ناس بتطلب مني تي شيرتات عن طريق سوق وبعد فترة لقيت شوية تي شحنات رجعت لى تاني بدون حتى ما تتفتح وما اتسلمتش فلما سألت ايه السبب قالولي واحد رجع في كلامه والتاني قال ماعوش فلوس! والتالت مش بيرد على موبايله وهكذا

خدوا بالكم بقى في كام واحد اتضر بسبب ان الناس دي بتهزر

  • انا اخدت الموضوع جد وطبعت التيشيرتات ودة كلفني وقت ومجهود وفلوس
  • أرامكس اخدت الموضوع جد وجت خدت مني الشحنة عشان توصلها ودة كلفهم وقت ومجهود وفلوس
  • سوق اخد الموضوع جد وكلم العميل اكد عليه قبل ما الطلب يطبع وبعدين لما الطلب ما اتوصلش سوق هو اللى اتحمل مصاريف الشحنة اللى اتاخدت من عندي ورجعت لى تاني .. ودة طبعا كلفهم وقت ومجهود وفلوس

كل اللى حصل دة بسبب الدفع عند الاستلام … لو واحد دفع ثمن السلعة على النت مقدما هيرد على تليفونه وهيقعد يستنى شركة الشحن عشان يستلم شحنته لأنها لو رجعتلى هو اللى هيتحمل مصاريف شحنها مرة اخرى

واحدة قريبتي كانت بتجيب حاجات من برة للناس وتخليهم يدفعوا بعد ما يستلموا لكن بردو للأسف في ناس كانت بعد ما هى تشتري الحاجة وتشحنها من امريكا وتدفع جماركها كانوا يقولولها لأ مش عايزين! وكانت بتضطر تعرض الحاجت دي للبيع وهى وحظها بقى

لو المواقف دي فضلت تتكرر للأسف في ناس كتير ممكن تبطل تشتغل من على الانترنت لأن الموضوع هيكون خسارته اكتر من ربحه

طب ايه الحل؟

الحل اننا نكون زينا زى كل البلاد التانية اللى بطلت تستعمل الطريقة دي… كتير جدا بلاقى مواضيع بعنوان:”أفضل طرق الدفع في العالم العربي”  ومناقشات عن ايه الطرق البديلة للدفع الالكتروني.. بصراحة بزعل جدا وبحس اننا للدرجة دي متأخرين لدرجة اننا عايزين نخترع لنا طرق مخصوصة؟

افضل طرق للدفع على النت في العالم العربي هى نفس طرق الدفع في العالم كله.. احنا مش ناقصين ايد ولا رجل

ولو موقع زى Paypal مش عايز يضيفنا احنا المفروض يكون عندنا القدرة اننا نعمل خدمة مماثلة ليه تساعد التجارة الالكترونية في العالم العربي بدل ما تموت قبل ما تبدأ . واصلا في مواقع غيره بتقبل الدول العربية زى Moneybookers مثلا .

هناك طريقة أخرى وهى الدفع عن طريق شبكات المحمول ودي انا لقيت مواقع بتقدمها لكن للأسف العمولة كانت عالية جدا يعني تصل الى 35%  ودة طبعا كتير جدا .. فلو شركات المحمول تعاونت في الموضوع دة ووفرت طريقة للدفع عبر كل الشبكات بعمولة معقولة دة هيكون حل هايل جدا وهيفتح سوق جديدة للشبكات دي

بعض المعوقات التي تقابل الناس في الدفع الالكتروني:

  • انا مش عندي حساب في البنك ازاى هدفع على النت

كنت كتبت مقال قبل كدة عن كروت الفيزا مسبقة الدفع مش بتحتاج يكون ليك حساب.. دي عاملة زى كروت شحن الموبايل كدة بتشحنها وتصرف اللى فيها ومش هيكون عليك اى ديون للبنوك.. انا شخصيا عندي اتنين وبشتري بيهم من امريكا وحتى مرة موقع كان ما بيقبلش كروت من خارج امريكا بردو قلت اجرب حظي ودفعت بيها ونفع 🙂  واشتريت من عليه بس حطيت العنوان بتاع صندوقي في ارامكس في امريكا بدل عنواني في مصر … مشي حالك يعني

  • انا خايف استعمل الكارت يتسرق رقمه

الكارت المسبق الدفع مش بينفع حد يشتري بأكتر من الفلوس اللى موجودة عليه فأفضل شيء انك تتركه فاضي طوال الوقت فحتى لو اتسرق رقمه مش هيلاقوا حاجة يسرقوها ولما تحب تشتري حاجة تشحنه وتستعمله علطول ويفضل انك ما تشتريش من مواقع غير موثوق فيها

  • انا مش واثق في البائعين على النت

الموضوع دة مهم جدا ودة اكبر دليل على اننا لو استعملنا طرق الدفع الالكترونية دة هيساهم في الرقى بالتجارة الالكتروينة لأن كل بائع هيكون عايز يبني ثقة بينه وبين المستهلكين والبائع اللى مش هيكون معروف بامانته محدش هيشتري منه .. فكل واحد هيقدم احسن خدمة عشان يجذب الناس لمتجره

لكن اذا كنت غير واثق في البائع يمكنك الشراء عن طريق موقع مثل Souq.com وهو بيكون وسيط بينك وبين البائع مقابل عمولة من البائع فقط ومش بيخلي البائع ياخد الفلوس الا بعد استلامك للسلعة

اتمنى ييجي اليوم اللى نبقى فيه زى الدول الأخرى ومش اقل منهم وتكون التجارة الالكترونية جزء اساسي من تعاملاتنا التجارية ويكون المستهلك العربي على درجة كبيرة من الوعى والجدية اللى تخليه لا “يعامل معاملة الأطفال”. والكلام دة مش معناه ان نسبة الناس اللى بتهزر ومش واخدة الموضوع جد عالية .. لا والله ابدا النسبة الأغلب محترمين جدا وجادين في معاملاتهم لكن لاحظ اننا لازلنا في البداية ومع ازدياد حجم التجارة هيزداد عدد المواقف اللى زى دي فلو تاجر صغير هيتحمل كل يوم مصاريف شحنة واحدة مثلا على الأقل دة معناه خسارة 600 جنيه في الشهر

  • السلام عليكم ..ازيك يا اوشى…للمرة الثانية اسجل اعجابى بمدونتك لانها متخصصة وووافية 🙂 ..انا حانشر مدونتك بين كل اصحابى لانها فعلا تستحق كل اهتمام

    انا كان عندى سؤال بخصوص الباى بال….هل تقصدى ان مينفعش نسجل فيه فى مصر…اصلى اعرف واحد فى مصر عادى قالى انا عملت عليه حساب وكنت بدفع منه عادى

    وهل اقدر افتح حساب على الباى بال بالكارت المسبق الدفع اللى ذكرتيه اللى بشتريه من كريدى اجريكول؟
    ولو انا عايزة ابيع حاجة على الاى باى لحد فى اوروبا مثلا..ايه الخطوات بالظبط

    اسفة انى بتعبك معايا
    والف شكر لكى مقدما 🙂

  • السلام عليكم ..ازيك يا اوشى…للمرة الثانية اسجل اعجابى بمدونتك لانها متخصصة وووافية 🙂 ..انا حانشر مدونتك بين كل اصحابى لانها فعلا تستحق كل اهتمام

    انا كان عندى سؤال بخصوص الباى بال….هل تقصدى ان مينفعش نسجل فيه فى مصر…اصلى اعرف واحد فى مصر عادى قالى انا عملت عليه حساب وكنت بدفع منه عادى

    وهل اقدر افتح حساب على الباى بال بالكارت المسبق الدفع اللى ذكرتيه اللى بشتريه من كريدى اجريكول؟
    ولو انا عايزة ابيع حاجة على الاى باى لحد فى اوروبا مثلا..ايه الخطوات بالظبط

    اسفة انى بتعبك معايا
    والف شكر لكى مقدما 🙂

    • نوران أنا آسفة لم ار تعليقك الا الآن.. عادة تصلني ايميلات بالتعليقات الجديدة ولكن لم يصلني ايميل لهذا التعليق

      الباى بال اذا اردتي تسجلي فيه لن تجدي مصر ضمن قائمة الدول المسموح لها باستخدامه.. البعض يتحايل على هذا الامر بانه يكتب عنوان آخر في دولة أخرى ولكن المشكلة انهم اذا لاحظوا ان هذا ليس هو البلد الذي تعيشين فيه عن طريق الآى بي بتاع الكمبيوتر مثلا سيغلقون الحساب وتضيع عليكي كل الفلوس الموجودة فيه .. يا ريت تسألي الراجل اللى عمل حساب فيه عن الطريقة وممكن تنشريها هنا عشان كلنا نستفيد

      لم ابع عن طريق الاي باى من قبل والاى باى هو الشركة المالكة لباى بال فلا اعلم اذا كانت تتيح لنا التسجيل ايضا كبائعين ام لا .. هجرب ولو نفع هنشر مقال مخصوص عن البيع على اي باى ان شاء الله

  • مرحباً

    اولاً نود ان نعبر عن اعجابنا بمدونتك الرائعة و عن هذا الموضوع المميز عن واحدة من اهم المشاكل التي تواجه قطاع التجارة الالكترونية في عالمنا العربي

    نحن في كاش يو فخورين باننا نقدم حلولا فيما يتعلق بمسائل الدفع الالكتروني عن طريق توفير وسيلة دفع عبر الانترنت مسبقة الدفع أمنة و سهلة الإستخدام

    أختي الكريمة ندعوك لتجربة خدماتنا و تزويدنا باي ملاحظات قد تساعدنا على تطوير خدماتنا بما يتناسب مع احتياجاتكم كتجار و مشتريين عبر الانترنت

    و لك جزيل الشكر

    • السلام عليكم

      أنا بالفعل فتحت حساب لدى كاش يو وحاليا في انتظار اتمام عملية دمج سلة التسوق على موقعي مع بوابة دفع كاش يو .. المبرمج قال لي انه سيبدأ الشغل في يناير واعتقد على منتصف يناير نكون انتهينا من الدمج باذن الله.. هى فعلا وسيلة آمنة سواء للمشتري او للبائع… وافضل شيء انها متوفرة في جميع فروع راديو شاك المنتشرة في كل مكان في مصر الى جانب طبعا موزعين آخرين

  • Emad

    أهلا بيكي وفعلا مقالك رائع
    ونحن نتفقر الي حد كبير الي التجارة الاليكترونية وكل هذه بسبب المفاهيم الخاطئة التي نتبعها
    حبيت أوضح لكي ان هناك وسيلة دفع جديدة
    عن طريق شركة dixipay
    وهي شركة جديدة أعتقد انها روسية وتدعم اللغة العربية
    ومن مميزاتها
    انها تقدم وسيلة الدفع ف موقعك عن طريق
    ثلاث طرق وهي عن طريق بطاقة المسبقة الخاصة بشركة dixipay
    والدفع عن طريق البطاقات الانتمائية
    والدفع عن طريق تحويل رصيد من حساب شخصي في موقع dixipay
    مثل بأي بال
    مثال
    https://www.dixipay.com/order_api/?recipient_account=201000000145&currency=USD&amount=1&product=Donate
    ملاحظة المثال هذا ليس لي علاقة بيه ولكن للتوضح فقط لأغير
    وايضا تمكنك من فتح حساب شخصي او تجاري بشكل مجاني
    ويمكن ربط البنك بالسكربتات المشهورة او عند طريق مبرمج باستخدام Api
    موديلأت جاهزه من البنك لربط البنك بهذه السكربت
    http://www.dixipay.com/ar/dev/shopping.php
    ودة لينك فيه الرسوم الخاصة بالشركة
    http://www.dixipay.com/ar/fees/personal.php
    ملاحظة الشركة لم اجربها بعد
    بس حبيت افيدك بيها

    • شكرا جزيلا على مشاركتنا بهذه المعلومة .. سوف اقوم بالاضطلاع على موقعم وربما اتعامل معهم
      شكرا مرة اخرى

  • Alajeeb111

    اتشرف بمتابعة مدونتك اللتي وجدت فيها كل ما يدور في ذهني من تساؤلات عن التجارة الالكترونية وابلغك أني قرأت جميع تدويناتك المميزة لكن ياليت تكتب باللغة العربية لان لغتك مصرية خالصة وانا سعودي وبحبها جدا لكن في غيري مش حيستفيد ابدا ولا ايه يافندم
    على فكرة المدونة قادتني للرغبة في الشراء من متجرك الرائع 
    وعندي طلب الا وهو كتابة تدوينة عن صاحب المتجر هل تؤيد أن يكون صاحب المتجر معروفا حتى يحصل على الثقة ويدفع الناس للشراء من متجرة