| اشترك عبر RSS

فوائد البيع عن طريق مول تجاري على الإنترنت

May 14th, 2010 مصنف في تجارة إلكترونية

بصراحة؟

أنا كنت بحسد الأمريكان!  أيو الله كنت بحسدهم.

مش بس عندهم وسيلة دفع سهلة وآمنة مثل Paypal اللى احنا محرومين منه. كمان عندهم مواقع زى e-bay و Amazon بيقدروا يبيعوا عن طريقها بسهولة و يحققوا مكاسب مهولة من التجارة الالكترونية

ما نجدش الأمريكان من الحسد بتاعي غير إعلان شاهدته على فيسبوك -واكيد معظمكم شافه- عن مزادات على موبايلات تبدأ من جنيه واحد. طبعا دفعني الفضول اني ادخل واشوف. لقيت الموقع عبارة عن مول تجاري فيه سلع كتير معروضة للبيع وبعضها عليه مزادات. قلت عادي يعني الناس بتبيع عن طريقه وخلاص.لكن اللى اكتشفته انه مش موقع عادي تضع فيه بضاعتك والناس تطلبها وخلاص على كدة ، دة طلع منظومة متكاملة لها قوانين صارمة معمولة مخصوص عشان تسهل عملية التجارة الالكترونية في العالم العربي عن طريق نظام يعرف بالدفع الآمن اوSafePay

كيف يعمل هذا النظام؟

باختصار يحمي هذا النظام المشتري-وهو أكثر واحد تجب حمايته- عن طريق أخذ موقع سوق ثمن السلعة منه وعدم توصيل المبلغ للبائع الا بعد موافقة المشتري على السلعة او عدم الشكوى منها وطلب ارجاعها. في الوقت نفسه النظام بيوفر حماية ايضا للبائع عن طريق ضمان وصول الأموال اليه بعد استلام المشتري للسلعة

فوائد هذا المول للمشتري

  • الشراء بسهولة وبدون مخاطر عن طريق الإنترنت
  • المقارنة بين أسعار التجار المختلفين واختيار أفضل سعر
  • إمكانية الدفع عند الاستلام
  • امكانية الدفع بكروت الفيزا دون القلق من البائع لأنك بتدفع لسوق وليس للبائع
  • نظام التقييم يجعل هناك مصداقية تمكن المشتري من معرفة سمعة التاجر قبل الشراء منه

فوائد هذا المول للبائع

  • زيادة عدد الزاور وبالتالي زيادة المبيعات (بشكل كبير وعن تجربة شخصية): واحدة صاحبتي قالت لى ان ثمن إيجار “كشك” صغير في سيتي ستارز (الاكشاك اللى على الممرات دي) بيكون تقريبا عشرة آلاف جنيها في الشهر! ولما حسبنا جدوى هذا الموضوع وجدنا انه ممكن اوي يكون مربح ببساطة لأن عدد زوار مول كبير مثل سيتي ستارز أكيد هيكون أكبر من عدد زوار محلك الخاص لو فتحته في شارع مش معروف وبالتالي هذا الكم الهائل من الناس اللى هيشوف سلعتك واكيد في منهم جزء هيشتري هيزيد مبيعاتك بشكل كبير. وبصراحة صاحبتي قالت لى جملة منطقية ،قالت لى انا بشوف ناس في الاكشاك دي بيبيعوا ايشاربات يعني اكيد لو العملية مش جايبة همها ماكانوش هيصرفوا كل الفلوس دي على ايجار الكشك! ودة بالظبط الفرق بين انك تبيع عن طريق موقعك الخاص فقط وبين انك تبيع في مول تجاري على الانترنت وهو: زيادة عدد الزاور
  • وجود عامل الأمان الذي يزيد الثقة عند المشتري وبالتالي يقبل على الشراء منك
  • التوفير في ميزانية الدعاية والاعلان: انت لما بتعمل حملة اعلانية (بغرض البيع وليس بغرض ال Branding) بتحاول تستهدف الناس اللى عندها نية الشراء عشان ما تصرفش فلوس الاعلانات على الفاضي وخصوصا لو ميزانيتك محدودة لانك مشروع صغير.الميزة في المول اولا ان هو نفسه بيعمل اعلانات عن نفسه! وثانيا ان الناس اللى بتزور المول غالبا بتدخل عشان عندها نية الشراء -واحد داخل مول تجاري داخل يعمل ايه يعني؟ مفيش بنات تتعاكس هنا- او على الاقل مهتمة انها تشوف ايه المعروض وفيه احتمالية كبيرة جدا عندها انها تشتري. فلو سلعتك جيدة وبسعر منافس ان شاء الله هتتباع
  • يمكن لأى واحد انه يبيع عن طريقه مش شرط يكون تاجر حتى لو عندك في البيت سلعة مستعملة عايز تبيعها بشرط ان تبين ذلك بصدق
  • يمكنك فتح متجر الكتروني Store في هذا المول ويكون عليه العلامة التجارية بتاعتك وتعرض فيه السلع بشكل منظم
  • توفير حجم الجهد المبذول في التأكد من جدية الطلب ومكالمة المشترين ومعرفة المقاسات المطلوبة والتأكد من البيانات لأن سوق يقوم بهذه المهمة نيابة عنك (بصراحة الله يكون في عون اللى بيشتغلوا في سوق بيشيلوا العبئ دة من عليا :)وعشان كدة بحب ابيع عن طريقهم اكتر ما ببيع عن طريق موقعي). فيه موقع آخر جربت أعرض عليه ولكن عشان مفيش متابعة لعملية الشراء من الادارة فكل الطلبات اللى جاءتني عن طريقه بلا استثناء كانت طلبات غير جادة يعني مثلا واحد بعد ما طلب وكلمته قال لى انا كنت بجرب الموقع بس 🙂 وواحد تاني قال لى طب هشوف المقاس وارد عليكي وما ردش وانا طبعا ما اتصلتش تاني.
  • لأول مرة تجتمع كل عوامل التجارة الالكترونية في مول عربي واحد: العرض-الشراء-الدفع-الشحن . كله عن طريق نفس الموقع
  • ضمان استلام أموالك من المشتري: جاءني تعليق يسأل عن مخاطر التجارة عن طريق الانترنت (بالنسبة للتاجر) فرويت له ما يحدث أحيانا على ال Paypal من عمليات نصب من قبل بعض المشترين الذين يستغلون نظام الحماية هناك ويقومون بعد استلام السلعة بالابلاغ عن انهم لم يستلموا شيئا ويطالبون باسترداد اموالهم من محفظة البائع وبذلك يخسر البائع السلعة والأموال. في حالة سوق هذه الحماية متوفرة للبائع لأن سوق نفسه هو من يقوم بالشحن عن طريق شركة متعاقد معها وبالتالي لا يمكن للمشتري انكار استلامه للسلعة
  • مساعدة فريق العمل لك في انجاح مشروعك: منذ عدة أيام ارسل الى فريق العمل بفكرة هايلة جدا تصلح للمشروع بتاعي وانا استغربت ازاى الفكرة دي ما جاتش على دماغي لكن دي ميزة احب اضيفها وهى ان بيكون في حد عايز يساعدك انك تنجح ببساطة لان نجاحك دة هينعكس على نجاح الموقع وانت لما بتعمل مشروع صغير بتكون لوحدك وبالتالي افكارك محدودة مقارنة بافكار فريق متكامل متخصص في مجال التجارة الإلكترونية

مفيش شك انك لما يكون عندك موقعك الخاص فدة بيجعل لك وجود مستقل وبشكل محترف على الانترنت لكن بردو ليس هناك ما يمنع ان تحاول زيادة مبيعاتك عن طريق مول تجاري الكتروني.فإن توفرت لك إمكانية الجمع بين الاثنين فدة يكون شيء ممتاز طبعا وان لم يكن يمكنك حساب ايهما افضل لتجارتك والاختيار بينهما. وأعتقد انه بالنسبة للناس اللى بتبيع عن طريق جروب على الفيس بوك المول هيكون حاجة مفيدة ليهم جدا عشان ممكن يفتحوا متجر او يعرضوا السلع بشكل منظم اكثر ويكون هناك حل شامل للشراء والدفع والشحن وبالتالي الناس تشتري بسهولة

  • Pingback: Tweets that mention Ooshi » » فوائد البيع عن طريق مول تجاري على الإنترنت -- Topsy.com()

  • Madyehab2010

    يعنى رايك يا رشا ان ممكن الواحد يبدء معاهم و اية المقابل انة يفتح متجر مجانا

  • حاليا مفيش مصاريف خالص عشان فترة تجريبية حتى الشحن مجاني بس بعد كدة ممكن تعرضي من خلالهم ببلاش ولما الحاجة تتباع بياخدوا من ثمنها 5 %
    ولو عايزة تفتحي متجر خاص عندهم بيكون ب50 جنيه في الشهر غير عمولة البيع اللى هى 5%

  • Pingback: links for 2010-10-29 « Free Open Source Directory()

  • Mona

    طب والله جميل اوى يا رشا انا بدأت فى شغل جديد وعايزه اعرض منتجاتى عندهم ممكن تقوليلى اعمل ايه وابدأ ازاى؟؟؟

    • بتروحي للموقع بتاعهم
      http://www.souq.com

      بتفتحي حساب وتعرضي حاجتك ومش هتدفعي حاجة غير لو حاجتك اتباعت بتدفعي 5% من قيمة الحاجة

      اضغطي على
      Sell

      وعلى حسب الحاجة اللى بتبيعيها بتختاري القسم اللى هيتعرض فيه حاجتك مثلا ملابس ولا كتب وبعد كدة بتكتبي تفاصيل المنتج وتحطي صور وتكتبي السعر

      اول ما يتباع هيوصلك ايميل وسوق هيكلموا اللى اشترى عشان يأكدوا على الطلب وبعدين يكلموكي

      بعد كدة ارامكس بييجوا ياخدوا منك الحاجة ويوصلوها والفلوس بتدخل حسابك على سوق

  • Om Al-Baraa

    أنا دخلت قبل كدا على سوق عشان اشتري طلب مني أعمل أكونت دخلت اسمي واميلي قالي اﻷسم مستخدم قبل كدا غيرته ولنفس اﻷميل قالي اﻷميل مستخدم قبل كدا ماعرفتش أعمل إيه أتصلت بخدمة العملاؤ ولا حد فادني بشيء
    مش عارفة إيه الغلط اللي عملته في التسجيل وإزاي أدخل إيميلي ومايقوليش مستخدم؟
    على فكرةانا دخلت على سوق الكويت