| اشترك عبر RSS

كيف تنشيء موقعك الإلكتروني بنفسك؟

April 2nd, 2010 مصنف في تجارة إلكترونية

أذكر أن والدي من سنين فاتت كان عمل موقع الكتروني للتعريف بشركته ولكن هذا تطلب منه ان يلجأ لاحدى الشركات التي تصمم المواقع وطبعا كانت التكلفة عالية دة غير انه لم يكن متحكما في الموقع بالشكل الكامل وانما كل الذي كان يتحكم فيه هو فقط الدخول على البريد الالكتروني للموقع للرد على الرسائل

هذا المقال هو بالأساس موجه لمن يريد انشاء موقع الكتروني بأقل التكاليف وبدون اللجوء الى مصمم مواقع. يعني مش لازم لو عايز تعمل موقع تروح لواحد يعملهولك صفحة واحدة ب900 جنيه في حين انك ممكن تعمل موقع كامل بأى عدد صفحات وفيه سلة تسوق كمان يعني ممكن تبيع من خلاله منتجاتك بــــ… استنوا اما احسب التكلفة بالكالكوليتور

آه  بأقل من 500 جنيه في السنة

أولا: الدومين

وهو عنوان الموقع بتاعك يعني مثلا

www.example.com

دة هتجيبه من عند عم جو دادي

Go Daddy

السعر بيختلف حسب النطاق لكن لو هتختار اشهر نطاق اللى هو

.com

هيكون في حدود 10دولار في السنة يعني  تقريبا 60 جنيه

حاول دايما انك تختار دوت كوم لأنه اسهل واحد في الحفظ ولو ما لقيتهوش متاح اختار دوت نت عشان مهم جدا ان الناس تقدر تحفظ الدومين بتاعك بسهولة.وكمان اسم الدومين نفسه اختاره سهل وقصير الله يكرمك بلاش نظام

www.abcdefghijklmn-opqrstuvwxyz.com

مش لازم كل ما واحد ييجي يقول لاصحابه على الموقع بتاعك عشان يدخلوه يقعد يدور في جيبه عن الورقة اللى مكتوب فيها اسم الموقع من كتر ما الاسم صعب وطويل

بعد ما تشتري الدومين تنتقل للخطوة التالية

ثانيا:الاستضافة

هتروح شركة من شركات الاستضافة زى

Hostgator ,Bluehost,1and1

وتختار النظام اللى يناسبك وهتلاقي الأسعار غالبا في حدود 7 دولار في الشهر ولو هتشترك لأكثر من سنة ممكن السعر يوصل ل5دولار يعني اقل من30 جنيه في الشهر يعني 360 جنيه في السنة

والشركات دي بتديك مساحة غير محدودة في مقابل الشركات المصرية او العربية التي تعطيك مساحة محدودة وبسعر اعلى..معرفش ازاى

طريقة الدفع: طبعا عشان الشركات دي في الخارج فهتدفع عن طريق موقعها على الانترنت بالطريقة التي ذكرناها من قبل وهى كروت الفيزا مسبقة الدفع التي لا تحتاج الى حساب بنكي ومافيهاش فوايد ووجع دماغ

تمام كدة؟ دلوقتي انت بقى عندك اسم الموقع ومكان للاستضافة … فاضل ايه؟

محتوى الموقع نفسه … المقالات والصور والبضاعة وكدة يعني

ثالثا:نظام لإدارة المحتوى

زى ما قلنا ان الكلام دة موجه للناس اللى ما عندهاش خبرة بلغات البرمجة فأمثل نظام تشتغل بيه هو

joomla

دة عبارة عن برنامج مفتوح المصدر يعني مجاني بتقوم بتنصيبه على السيرفر بتاعك بعد ما تشترك في خدمة الاستضافة وبيخليك تنشر مقالاتك وصورك  واى حاجة عايز تنشرها على الموقع. والأهم من كدة انه بيمكنك انك تفتح سوق او متجر على موقعك عن طريق سلة تسوق

shopping cart

بتعرض فيها منتجاتك والناس ممكن تطلب مباشرة من على الموقع والطلب بيوصلك وممكن كمان يدفعوا عن طريق الانترنت

البرنامج مجاني وسلة التسوق كمان في منها مجاني

والاهم من كدة ان اى حد ممكن يستعمله بسهولة كأنك بالظبط بتكتب في مدونة

بالنسبة للتصميم فجملة له قوالب جاهزة منها المجاني ومنها اللى بتشتريه بس عامة اكيد هتلاقي قالب يناسبك

اكتب في جوجل

free joomla templates

وهتلاقي مواقع كتير اختار منها اللى يعجبك


دي باختصار الخطوات التي تتبع في انشاء موقع الكتروني واللى انا نفسي اتبعتها أظن مافيش اسهل من كدة

ومصممي المواقع ما يزعلوش مني بس انا من انصار

DIY – Do it Yourself

اعملها بنفسك … طبعا عشان ارخص

وفُتكم بعافية



  • Pingback: Tweets that mention كيف تنشيء موقعك الإلكتروني بنفسك؟ -- Topsy.com()

  • salooo

    helwa ya ooshiii kont ebtadet azha2 we afkr adeha le 7ad besra7a

  • لا ان شاء الله هتعمليه بنفسك وهيبقى احلى وارخص بكتير من لو اديتيه لحد يعملهولك

  • Samaa112

    كيف اقوم بعمل صندوق ادعوا اصدقاءك لصفحتي بدل من اقتراح الاصدقاء

  • Zaki Designer

    شكرا على المعلومات القيمة
    ان مصمم مواقع
    ده اخر شغل لى
    http://www.lifeislingerie.com/
    و حضرتك شجعتينى اتعلم جملة

  • الميزة في جملة انه سهل الاستخدام وممكن لو انت عملت موقع لعميل هو بعد كدة يدخل يحدث الموقع بنفسه بكل سهولة ويكتب المقالات وينشرها . انا الموقع بتاعي
    http://www.ooshi.net قائم على جملة
    لكن المدونة التابعة للموقع دي قائمة على ووردبريس والاتنين كانوا سهلين جدا في الاستخدام بالنسبة لى وخاصة اني زى معظم الناس ليس لدي خبرة بلغات البرمجة

  • الفيس بوك خلاص هيلغي الصناديق بداية من يوم 23 اغسطس

  • Emad

    بصراحة من المرات القليلة اللي ألقي فيها بنت مهتمه بتصميم وتطوير المواقع
    وبالفعل جملة من أفضل برامج ادارة المحتوي ولكن يعيبها البطيء نسبيأ في التصفح
    ولكن عند استخدامك لجملة أو اي نظام محتوي أخر لأبد من الابداع والتعديل
    حيث لأ يكون موقعك مشابهه لالف المواقع التي تستخدم نفس برنامج ادارة المحتوي

  • Norma201010

    طب انا عايزة اعمل موقع ممكن الشرح
    لانى جديدة فى الموتضيع دى ومش عارفة ازاى  

  • Sahar Emarketing

    لو ممكن شخص يعلمني كيف استخدم موقع( جملة) لانشاء موقعي خطوة بخطوة, واكيد يكون باجر معين هو يحدده ,ارجو مراسلتي في حالة المساعدة 
    sahar.emarketing@gmail.com

  • T3net

    جملة نظام معقد بعض الشئ واكثر ما يعيبة قلة التصميمات المتاحة بعكس الورد بريس تصميمات كثيرة جدا

    http://wzayfonline.blogspot.com

  • koky

    ممكن اسالك انتى عملتى المدونة دى ازاىىخ

  • Yosef Zezo

    كلام جميل جزاك الله خير لو عندك معلومات تانيه ياريت تنشرها

    • Yosef Zezo

      الو سمحت عايزه مساعدات بس باللغه العربيه انا لسه جديده وبحاول افهم التسوق لو ممكن المساعده