| اشترك عبر RSS

ثمانية أسباب تخلي الناس ما تشتريش منك

March 13th, 2010 مصنف في تجارة إلكترونية

لو سمحت بكام دي؟

انظر الخاص عندك

How much?

Check your inbox

دي بتحصل كتييير جدا على الفيس بوك ويفضلوا الناس تحت كل صورة يكتبوا بكام؟ بكام؟ بكام؟

دة اول سبب يخليني انا شخصيا ماشتريش من متجر الكتروني معين وهو

عدم وضوح سياسة التسعير

ليه ما تكتبش اسعارك مادامت اسعارك موحدة للناس كلها.. انت كدة بتخسر زباين كتير اوي بيفتكروا ان انت ما عندكش مصداقية وانك بتدي السعر على حسب مستوى العميل

واحدة صاحبتي راحت محل اثاث كبير وسألتهم على الأسعار قالوا لها اسعار غالية جدا راحت باعته السواق بتاعها يسأل تاني قالوا له اسعار تانية خالص أقل!!! طبعا دي تنسف مصداقية اى مشروع عند الناس

ممكن افهم ان محل يعمل تخفيضات لزباينه الى اشتروا منه اكتر من مرة لكن اللى مش قادرة افهمه ليه الناس ما تعلنش اسعارها الموحدة امام الجميع؟؟؟

مرة كلمت محل ادوات صحية: لو سمحت السيفون بتاعي باظ وعايزة اشتري واحد جديد ممكن اعرف بكام؟

الاجابة: ما بنقولش اسعار في التليفون

هى الاسعار دي سر نووي؟

المغالاة في الاسعار بشكل غير منطقي


“هو كل من هب ودب هيشتري السلعة بتاعتي ولا ايييييييه؟”

بعض الناس بيكون عايز المنتج بتاعه يقتصر على فئة معينة من الناس هى فقط اللى تشتريه عشان المنتج ما “يبيأش”  أولرغبته في الثراء السريع بين يوم وليلة فبيلجأ لرفع الاسعار بطريقة مبالغ فيها جدا…بس في رأيي المتواضع دة خطأ للأسباب التالية

أولا:ان المنتج بتاعك لسة في بدايته وبالتالي انت مش ماركة معروفه فاى واحد هييجي يشتري منك وتقوله مثلا التيشيرت دي ب250 جنيه علطول هيقارن بينها وبين اى تيشيرت ماركة مشهورة ممكن يجيبها بنفس السعر دة او اقل وغالبا المقارنة هتكون في صالح الشركات الكبيرة اللى عملت اسمها في السوق وخاصة ان الفئة اللى انت عايز تستهدفها دي بالذات بيحبوا يلبسوا ماركات

ثانيا: لازم تعرف ان الفئة اللى انت بتستهدفها دي قليييلة جدا يعني ممكن ما تحققش لك الربح اللى يخليك تستمر في تجارتك دة غيرانها فئة من الصعب جدا ارضائها يعني ممكن في الآخر ما يشتروش منك خالص ويشتروا الماركات زى ما قلتلك

وأخيرا:الحالة الوحيدة اللى ممكن تبرر رفع الاسعار هى انك تكون بتتعب في المنتج دة يعني مثلا بتشتغله بايدك وبياخد منك وقت ومجهود فلازم يكون العائد مرتفع عشان تستمر في الانتاج والا هتتعب وتوقف علطول وكمان عشان لو الاسعار قلت والطلب زاد ممكن ما تلاحقش على الطلبات ويجيلك انهيار عصبي في الآخر

من الآخر:خليك واقعي واحسب السعر على حسب المعطيات بتاعت السوق وبتاعت المنتج بتاعك

عدم وجود حاجة للمنتج بتاعك


“هتودي بطاطين الكونغو يا ابراهيم؟”

سؤال منطقي بردو من يوسف بك وهبي

من بدائيات التسويق هو اننا نعرف حاجة السوق للبضاعة بتاعتنا

ما تنتجش حاجة السوق مش محتاجها وبعدين تحاول تسوق لها عشان تتباع… بالعكس قبل ما تبدأ شغلك ادرس السوق وشوف هل السوق فعلا محتاج البضاعة بتاعتي ولا لأ… لأن لو السوق مش محتاج البضاعة يبقى مش هتتباع او مش هيكون عليها اقبال وفي الحالتين هتخسر

الناس مش فاهمة المنتج بتاعك دة بيعمل ايه اصلا

ما ينفعش تكتب على الموقع بتاعك

احنا وبلا فخر اول من ادخل الفنكوش الى العالم العربي

انهاردة شركة سبيد بتقدملكوا منتج هز الاسواق العالمية : الفنكوووووش

شهادات العملاء

أنا لما اشتريت الفنكوش حياتي اتغيرت وبقيت علطول منفوش

جوزي قالي عليا الطلاق بالتلاتة يا ولية لانتي شارية الفنكوش

حضرتك انا لما جبت الفنكوش حضرتك بقيت حضرتك حاسس اني كدة كأني بقيت حاصل على شهادة الأيزو

ماشي … ايه هو الفنكوش بقى؟ ما عرفناش في الآخر دة عبارة عن ايه حضرتك

ما تفترضش ان الناس كلها عارفة ايه هو الفنكوش

اشرح لهم ما هو الفنكوش؟ ماهى مكونات الفنكوش؟والاهم من كدة ليه خلى الراجل منفوش؟

احساس الناس بعدم الثقة


دة سبب مهم اوي وخصوصا انك بتبيع عن طريق الانترنت يعني الناس مش شايفة البضاعة وتقدر تعاينها

لازم تديهم احساس بالامان ما ينفعش مثلا تكتب

البضاعة المباعة لا ترد ولا تستبدل

بغض النظر عن ان الجملة دي غير قانونية وتخالف قانون حماية المستهلك لكن بردو الجملة بتدي احساس كبير بعدم الامان … طب افرض البضاعة طلعت بايظة؟

في متجر الكتروني اشتريت منه اكتر من مرة وعجبني اوي وعشان انا دايما بحب اشجع الحاجات دي بدأت اقول للناس عليه عشان يجربوه… وفي مرة اختي كانت عايزة تشتري طابعة (برينتر يعني) فقلت لها ما نطلبها دلوقتي من على النت وهتجيلك لحد البيت وفعلا عملتلها الطلب .. تاني يوم كلموها وقالوا لها اللى انتي طلبتيها مافيش منها غير واحدة بس في المخزن ودي آخر واحدة بس الكرتونة بتاعتها مخرومة

أختي ماكانش عندها مشكلة انها تشتري حاجة الكرتونة بتاعتها مخرومة مادام الجهاز نفسه سليم بس اللى خلاها ما تشتريش ان الست قالت لها لو اشتريتيها وحبيتي ترجعيها هيبقى فيه غرامة!! انا مش قادرة افهم ازاى ادفع غرامة لو الجهاز طلع بايظ؟

طبعا القرار في الحالة دي كان : طيب خلاص انا هنزل اشتريها بنفسي من اى محل عشان اعاينها بنفسي وحتى لو طلعت بايظة فهيبقى عليها ضمان مش عليها غرامة

وهما كدة خسروها كزبونة وخسروني انا كمان وخسروا كل الناس الى كانوا ممكن ييجوا عن طريقنا .. اتمنى ان دي تكون غلطة موظف مش سياسة الموقع دة لاني فعلا بحبهم

الزننننننننننننننن


بعض المواقع الاجنبية اللى دخلتها بيكون عندها قدرة على الزن غير عادية

كل سطرين تقولك اشتري الآن اشتري الآن اشتري الآن لاااازم تشرب ايمانا منهم بأن الزن على الودان امر من السحر

لازم هما يعرفوا ان المستهلك مش حمار

المستهلك مش هيدفع فلوس في حاجة هو مش مقتنع بيها او مش محتاجها ولما بيلاقيك عمال تزنننننننن عليه بيهرب بسرعة من كتر زنك ولانه حس ان الزن دة اكيد وراه نصب

الناس مش عارفين يوصلولك


ممكن تكون السلعة بتاعتك هايلة والسوق محتاجها لكن لأنك ما اعلنتش عنها بالشكل الكافي وما عملتش واجب التسويق بتاعك فالناس اصلا ما سمعتش عن سلعتك

ما تراهنش على الناس اللى اشتروا منك انهم هيروحوا يقولوا لأصحابهم عليك لأن بكل بساطة ممكن ينسوا

لازم انت كمان بدورك تعمل تسويق للمنتج بتاعك بأكثر من وسيلة وتحاول توصل كلمتك للناس على قد امكانياتك وميزانيتك طبعا وان شاء الله هنتكلم عن الوسائل المتعددة للتسويق في مرة قادمة وهنحاول نلاقي طرق للتسويق باسعار رخيصة .. يعني مش لازم تروح لشركة دعاية واعلان عشان يعملولك اعلان ويطلع في التليفزيون

خدمة العملاء سيئة


من كام يوم كنت بكلم شركة شحن

لو سمحت عايزة اعرف لو عايزة ابعت شحنة وزنها اقل من كيلو داخل القاهرة تبقى بكام؟

يبقى ب16 جنيه ونص

طب لو عايزاكوا تحصلولي ثمن المنتج من العميل هيبقى السعر كام؟

لأ ما بنحصلش فلوس

يعني ايه مش بتحصلوا فلوس؟      (ملحوظة: انا ما سألتش السؤال دة لأني غبية او ما بعرفش عربي.. انا سألت السؤال دة لسبب واحد بس وهو انهم كاتبين على الموقع بتاعهم ان عندهم خدمة الدفع عند الاستلام يعني انا بسأل عن حاجة هما بيقولوا انها موجودة عندهم) دة غير اني كان جايلي شحنة عن طريقهم تاني يوم وعليها تحصيل فلوس مني

يعني.. ما بنحصلش.. فلوس ..وقالها بطريقة وصوت يحسسك اللى هو يعني انتي ما سمعتيش؟ او ما بتفهميش؟

قلت له بس انا جايالي شحنة عن طريقكوا بكرة وعليها تحصيل فلوس ازاى مش بتحصلوا فلوس؟

قال لى دي بتبقى حاجة تانية وبيكون اتفاق مع الشركة

آه يعني افتح حسا..؟

اى حاجة تانية اقدر اساعدك فيها؟

ما ردش على سؤالي لانه اصلا ما اهتمش انه يسمعني للآخر

قلت له لأ وقفلت السكة وقلت في نفسي مش عايزة اتعامل معاكوا اصلا .

طبعا دي لو كانت خدمة عملاء كويسة كان المفروض يسألني هو حضرتك عايزة تفتحي حساب معانا؟ ويفهم مني اذا كنت انا واحدة عادية عايزة تبعت شحنة عادية ولا انا بشتغل وعايزة افتح حساب واتعاون معاهم

نصيحة: اختار موظفي خدمة العملاء بعناية شديدة لانهم واجهة الشركة

ودي كانت بعض الاسباب اللى تخلي الناس ما تشتريش منك


انا مش هبعت المقالات تاني على الفيس بوك لأن مالهاش علاقة اوى بموضوع ال

Fanpage

فلو عايز تتابع المقالات دي ابقى زور المدونة من حين لآخر او تابعنا على تويتر


  • Pingback: links for 2010-10-29 « Free Open Source Directory()

  • Hamoksha_7amoo

    احب اشكرك علي المقالات لانها فعلا جميله وانا كنت بدور عليها . بس كنت عاوزه استشاره في حاجه انا قريت من فتره كده عن التجاره الالكترونيه وحكايه المدونات وانك ممكن تعمل مدونه وتكسب منها فلوس من خلال اعلانات جوجل فعاوز اعرف ايه رايك في الموضوع ؟؟؟

    • أشكرك على تعليقاتك في المدونة وتشجيعك
      بالنسبة للمدونات ففعلا ممكن تكسب عن طريق الاعلانات بس لازم تشتغل كويس على
      المحتوى اللى هتقدمه في المدونة عشان تجذب اكبر عدد من القراء. و بتختار موضوع
      متخصص للمدونة يكون عليه اقبال من الناس لأن طبعا كل ما يزيد عدد القراء كل ما
      ممكن تكسب من الاعلانات سواء عن طريق جوجل او حتى الاعلانات بالاتفاق مع
      الشركات ودي ممكن تكسبك اكتر عشان ما حدش هيشاركك نسبة فيها لكن زى ما قلت
      بتحتاج عدد كبير من الزوار وكتابة مقالات بشكل شبه يومي

      2011/1/21 Disqus

  • Mansour

    معلومات فعلا قيمة وغالية لكن لو تسمحى انا عندى سؤال . عندى صناديق كتب عاوز اشحنها لامريكا اية ارخص طريقة غير دى اتش ال و ارامكس و فيديكس لان الشحنة كبيرة .

    • عن طريق البريد المصري

  • Semoo Hosni

    انا بتعامل مع شركة فوكس ترانس للشحن وخدمات البريد السريع انا قارنت اسعارهم بأسعار كذا شركة وفى الاخر الحمد لله استقريت على شركة فوكس ترانس وهكتبلكو البيانات اللى على الكارت
    شركة فوكس ترانس
    للشحن والتخليص الجمركى وخدمات البريد السريع
    01000760906 – 01222980321
    25173068
    ahmed.foxtrans@gmail.com
    foxtrans@groups.facebook.com

  • Alajeeb111

    كلام جمييل بس ليه فسرت كلمة طابعة بالبرينتر يعني نفسر الانجليزي بالعربي ماشي بس نفسر العربي بالانجليزي مش معقول

  • أنا مسئول عن موقع إليكترونى كبير … وكمان بكتب شعر ومقالاتفى الحقيقة أنا مبسوط جداً بالمعلومات اللى بتقدميها وكمان طريقة الكتابة بتاعتك اللى بتجبر القارئ على تكملة المقالة للنهاية … أطلب منك تقديم المزيد و أتمنى لك الكثير من النجاح

  • sam

    شكرا على المقال …طريقتك في العرض رائعه وبلهجه مصريه حلوه

  • Rosa Meso

    جميل جدا جدا