| اشترك عبر RSS

مميزات وعيوب المتجر الالكتروني

March 4th, 2010 مصنف في تجارة إلكترونية

عارف الواحد لما يكون عارض بضاعته وبعدين ييجي وقت الصلاة يقوم يغطي البضاعة بالملاية ويجري على المسجد فييجي واحد ينشله كام حتة من المعروضين ويجري

او مثلا لو ربنا فاتح عليه وعنده محل ليه باب زجاج يقوم يقفل على بضاعته ويعلق يافطة مكتوب عليها مغلق ..بس طول ما هو في الصلاة الشيطان يقعد يوسوسله ويقوله:حبك يعني تروح تصلي في المسجد طب افرض الزباين كلهم فجأة اكتشفوا انهم في حاجة ماسة لبضاعتك ييجوا ويلاقوا المحل مقفول؟ وتضيع عليه البيعة؟ هو مش العمل عبادة بردك؟

ساعات كنت ببقى واقفة في صيدلية أمي وكان لما ييجي وقت الصلاة افكر طب اعمل ايه دلوقتي .. اقوم انزل الباب الجرار بتاع الصيدلية عشان ما حدش يدخل … يقوموا الزباين يرفعوا الباب الجرار ويدخلوا … إهيييي!.. طب المرة الجاية هحط كرسي ورا الباب بقى… فكانوا يزقوا الباب والكرسي ويدخلوا برضو!!! وما كانش ينفع اغلق الباب الجرار بالفقل طبعا لانه بتقفل من برة

المقدمة الطويلة دي كلها عشان في الآخر اقول لكم اننا انهاردة هنتكلم عن مميزات وعيوب المتجر الإلكتروني

أولا تعريفات بسيطة كدة

ما هو المتجر الإلكتروني؟

هو زى اى محل عادي بس على الإنترت … بتعرض فيه بضاعتك و الناس تشوفها، تعجبها ،تشتريها

ما هى مكونات المتجر الإلكتروني؟

أولا: الدومين وهو العنوان اللى عن طريقه الناس تقدر توصل لمتجرك مثلا

www.example.com

ثانيا: الهوست او الاستضافة وهى الشركة اللى بتديلك مساحة تأجرها على النت عشان تعمل فيها الموقع بتاعك زي ما بتروح تأجر مكان عشان  تعمله محل تعرض فيه بضاعتك

ثالثا: الموقع الإلكتروني ودة هو المحل بتاعك نفسه او الصفحة اللى بتعرض فيها البضاعة ممكن تبقى موقع خاص او جروب او صفحة عل الفيسبوك

رابعا: البضاعة زات نفسيتها

مميرات المتجر الإلكتروني
  • انه بيكون مفتوح طول الوقت مش محتاج تقفله ولا تحط عليه ملاية ولا تحط كرسي ورا الباب

وبتبيع بضاعتك وانت نايم

  • ان زبائنك ممكن ييجوا من كل مكان بسهولة … يعني زبائن اكتر واتنشار اوسع وامكانية تصدير للخارج
  • تكاليف انشائه قليلة جدا

مقارنة بالمحلات العادية التي تحتاج فلوس كتير لايجارها في حين ان ايجار مساحة على النت ممكن تكون فقط ب 30 جنيه في الشهر ولو هتعمل جروب هيبقى ببلاش خالص وهنتكلم بعد كدة ازاى تنشئ موقع الكتروني بأقل التكاليف

  • لا يحتاج لموظفين .. ممكن تباشره بنفسك وبكدة تقلل التكاليف
  • الناس بيكون امامها الفرصة لمقارنة الاشياء والاسعار على الانترنت من متاجر مختلفة ويختاروا

افضل حاجة

عيوب المتجر الإلكتروني
  • غير مألوف في الدول العربية ..ثقافة الشراء من على النت لسة ما انتشرتش اوي
  • الناس مش بتقدر تعاين الحاجة قبل ما تشتريها … يعني زي البطيخة
  • هتحتاج وقت عشان تخلي الناس تثق فيك وفي جودة بضاعتك
  • في ناس ممكن ما يكونش عندها جدية في الشراء ويتعبوك انت  ويخسروك على الفاضي

مرة واحد طلب مني تيشيرتات وقال انه هييجي يستلمها بنفسه وبعد ما طبعتها سافر! بعد ما رجع سافر وبعد ما سافر رجع وبعدين….قال خلاص مش عايز.. طبعا ما تقدرش تجبر حد انه يشتري حاجة لكن بعض التصرفات هتعرضك للخسارة و ضياع الجهد وعشان كدة برة مافيش طرق للدفع غير عن طريق النت مقدما لضمان الجدية .. طريقة الدفع عند الاستلام دى نادرة جدا جدا جدا

  • زى ما قلنا في المميزات ان الناس هتعاين الحاجة من متاجر مختلفة

يعني لو حاجتك مش مميزة وسعرها مش منافس ماحدش هيشتري منك

المرة اللى جاية ان شاء الله  هنتكلم عن اسباب تخلي الناس ما تشتريش من متجرك الالكتروني

وفُتكم بعافية

  • انا بجرب موضوع التعليق بحساب الفيسبوك

    هبدأ بنفسي انا مش هشتري من متجر مش بيكتب اسعاره واضحة وصريحة للناس